Гар утас улам ухаалаг болсоор байгаа өнөө үед эрүүл мэндийн шинжилгээ оношилгоог ч утсаараа хийх боломжтой болжээ.  TED-ийн судлаач Мишкин Ингавале гар утасны шинэ төрлийн аппликэйшн зохион бүтээснээ саяхан зарласан байна. “Uchek” хэмээн нэрлэж буй энэхүү аппликейшний тусламжтайгаар шээснээс  25 төрлийн шинжилгээ хийж, зохих онош гаргах боломжтой гэнэ. Үүний тулд 20 ам.доллараар энэхүү аппликэйшнийг iPhone утсандаа татаж авна. Үүний зэрэгцээ шинжилгээ хийх хамгийн гол хэрэгсэл болох тестерийг авах ёстой. Ингээд тестерийг шээсэндээ дүрэхэд биеийн байдлаас шалтгаалан янз бүрийн өнгөнд хувирдаг байна. Үүний дараа тестерийнхээ зургийг гар утсаараа авах бөгөөд утас тань тестер ямар өнгөнд хувирснаар таны эрүүл мэндэд ямар асуудал байгааг оношилж гаргах ажээ.

 Ингэж хийсэн шинжилгээний дүн лабораторт хийсэн шинжилгээний хариутай яг таг таарч байгаа аж.  Тиймээс энэхүү шинжилгээ хийдэг аппликэйшнийг ирэх сарын сүүлээр iPhone –ий аппликэйшн дэлгүүрээр худалдаалж эхлэх ажээ. 
Одоогоор энэхүү аппликэйшнийг зөвхөн iPhone-д зориулан гаргаад байгаа ч удахгүй бүх төрлийн андройд утсанд зориулан хийнэ гэж зохион бүтээгч нь хэлж байна.