“Татар” хамтлаг арван жилийн ойгоо тохиолдуулан “Нөлөөллөөс дээгүүрт” аяныг энэ сарын 2-нд эхлүүлнээс хойш 10 мянга гаруй залуусыг эгнээндээ нэгтгээд байна. Аяны зорилго нь өнөөгийн нийгэмд тулгамдаад байгаа архидалтын эсрэг, түүний нөлөөнд автсан залуусыг хорт зуршлаас нь татаж гаргахад чиглэж байгаа юм. Энэхүү аяны хүрээнд “Татар” хамтлаг дүүрэг бүрийн хэмжээнд цомхон тоглолт хийж, фэн клубээ байгуулж байна.  Хэрэв “Татар”-ын сонсогчид фэн клубт нь нэгдэж, фэн карт авсан тохиолдолд Skytel-ийн D20 дугаарыг 1000 төгрөгөөр авч, “Тэнгис” кино театрт 50 хувийн хөнгөлөлттэйгээр кино үзэх эрхтэй болох аж.
Татар хамтлаг аяныхаа нэрээр нэрлэсэн “Нөлөөллөөс дээгүүрт” цомгоо гаргаад буй. Тэд борлуулалтаас олсон орлогоо энэ аяндаа зориулж байгаа юм. Тэд аяныхаа талаар хэлэхдээ “Бид анх бусдын хайрыг хүндэл гэж гарч ирсэн. Одоо ч гэсэн бид тэр хэвээрээ байгаа. Туурвисан бүтээлийнхээ утга санааг агуулж “Нөлөөллөөс дээгүүрт” аянаа явуулж байна. Залуусыг нэгдэхийг уриалж байна” гэсэн юм.
“Татар” хамтлаг ойн тоглолтоо ирэх сарын 5-нд хийхээр төлөвлөөд байгаа аж.