Дэвид Бекхэмийн гэргий Викторияг бараг инээмсэглэдэггүй, хөндий хүйтэн царайтай гэж ихэнх хүн боддог. Тэгвэл Дэвид Бекхэм эхнэрээ яаж инээдгийг Facebook-ээр батлан харуулав. Тэрээр Викториягийн инээж буй зургийг Facebook-тээ дэлгээд “Хар л даа, түүнийг инээдэг гэж би хэлсэн биз дээ” хэмээн бичсэн байна. Үнэндээ ч бизнес, ажил хэргээр Хятадад гэр бүлээрээ зочлон ирээд байгаа Дэвид Бекхэм, Виктория Бекхэм нар чөлөөт цагаа ч тун сайхан өнгөрүүлж буй бололтой.

Дөрвөн хүүхдээ гэртээ үлдээгээд хоёул Бээжинд хэд хоногийг өнгөрүүлэхдээ Дэвид Бекхэм Хятадын хөлбөмбөгийн элчийн үүргээ гүйцэтгэж, хажуугаараа нь эхнэрийнхээ загварын хувцасны брэндийг Хятадад танилцуулж, бизнесээ өргөжүүлэхэд нь туслаж байгаа юм. Тэд хамтдаа Хятадын CCTV-д ярилцлага өгч,  Виктория Бекхэм өөрийн брэндийн шинэ загварыг хятад үзэгчдэд танилцуулсан байна. 

Алдарт хосыг хятадууд маш найрсгаар угтан авсан бөгөөд Дэвид Бекхэмийг харах гэсэн фэнүүд нь хэт олноороо цугларснаас болж цөөнгүй хүн бэртэж гэмтсэн харамсалтай тохиолдол ч гарсан юм. Дэлхийн хамгийн том зах зээл болох Хятадад эхнэрийнхээ бизнесийг өргөжүүлэх нь Бекхэмийн гэр бүлд чухал учраас Дэвид Бекхэм хөлбөмбөгийн элчээр ажиллах өндөрт өртөгтэй гэрээт ажлынхаа зэрэгцээ давхар Виктория Бекхэмийн брэндийг сурталчилж явна.




Виктория Бекхэм Хятадад өөрийн брэндийг сурталчилж явна.

Харин түүний нөхөр Хятад хүүхэд залууст хөлбөмбөгийн спортыг сурталчлах элч төлөөлөгчийн ажлаа хийгээд завгүй.