“Камертон” хамтлагийн 18 жилийн түүхт ойн өдөр өчигдөр тохиож, тэд эрийн цээнд хүрлээ. 18 жилийн тэртээ хөгжим бүжгийн коллежийн оюутан Д.Болд, Г.Мэнд-Амар нар Б.Ган-Эрдэнэ, Б.Эрдэнэбат хоёрт хамтран дуулах санал тавьснаар “Камертон” хамтлаг анх байгуулагдсан түүхтэй. Рок, попын ертөнцөд тэд өөрсдийн байр сууриа эзлэн олон хит дуу эгшиглүүлсэн. Тэдний анхны уран бүтээлүүдийн нэг “18 нас” дуу залуусын дунд өдгөө ч дуулагдсаар байна.  Хамтлаг байгуулагдсан цагаасаа хойш арван цомог гарган 14 тоглолт хийж, “Алтан микрофон” наадмын “Шилдэг хамтлаг”, “Шилдэг цомог”, “Пентатоник” наадмын “Шилдэг хамтлаг”-аар шалгарсан гээд тэдний шагналын буухиа үргэлжилнэ. Өнгөрсөн жил тэд “Боловсрол суваг” телевизтэй хамтран “Камертон 2” шоуг 720 гаруй залуусын дунд амжилттай зохион байгуулан өөрсдийнхөө шинэ өрсөлдөгчдийг өлгийдөн авсан. “Камертон” хамтлагийн ахлагч, Төрийн соёрхолт, дуучин Д.Болд тус хамтлагийн продюсераар ажиллаж байгаа ч одоогоор шинэ хамтлагтаа  нэр өгч амжаагүй. Харин шинэхэн “Камертон” хамтлагийн бүрэлдэхүүнд багтсан залуус гадаад хэлний боловсролдоо анхаарахаар Сингапурыг зорьсон гээд хийсэн ажлыг нь бичээд ч барахгүй. 18-тай хамтлагийн залуус тун удахгүй шинэ цомог, шинэ тоглолтоороо үзэгчидтэйгээ уулзана гэдгээ дуулгасан. Шинэхэн цомогт нь “Камертон 2” шоуны ялагч дөрвөн залуутай хамтран дуулсан уран бүтээл нь ч багтсан аж. Хамтлагийнхаа төрсөн өдрийг фенүүдтэйгээ нижгэр хийхээр төлөвлөсөн ч Монгол Улсын Ерөнхийлөгчийн сонгууль давхцсан тул хэсэг хугацаагаар хойшлуулжээ. Тун удахгүй тэд зөвхөн фенүүдтэйгээ 18 насны төрсөн өдрөө тэмдэглэнэ гэдгээ амласан юм.