Алдартай оддын хүүхдийн гэрэл зургийг зөвшөөрөлгүйгээр авахыг хориглох паппарацчдын эсрэг хуулийн төслийг Америкийн хууль тогтоогчид гаргаад байна. Энэхүү хуулийн төслийг папарацчдад таагүй ханддагаараа нэртэй Холливудын од Холле Берри идэвхтэй дэмжиж байгаа ажээ. Тэрээр нэгэн удаа Лос Анжелосын нисэх онгоцны буудалд гэр бүлийнх нь зургийг авсан гэрэл зурагчин руу орилж таагүй ааш гаргасан явдал бий. Хуулийн төслийг санаачилсан сенатор Кевин Дэ Леон хуулиндаа төрийн албан хаагч, шүүгч, хуульчдын хүүхдүүдийг ч багтаахыг хүсч байгаа ажээ. Хэрэв уг хууль батлагдвал оддын хүүхдүүдийн зургийг зөвшөөрөлгүйгээр авсан гэрэл зурагчинг 10 хоногоос нэг жил хүртэл хугацаанд хорих, 10000 ам.долларын торгууль хүлээх ял шийтгэл хүлээж байгаа юм. Сэтгүүл зүйд халтай гэж үзэж буй энэ хуулийг эсэргүүцэгчид ч цөөнгүй байна. Калифорнийн сонин хэвлэгчдийн холбооноос уг төслийг эсэргүүцэж байгаагаа илэрхийлж, “Зураг авах нь сэтгүүлчдийн хийдэг ердийн ажил” хэмээн мэдэгдсэн байна.