Америкийн телевизийн алдарт хөтлөгч Опра Уинфри өнгөрсөн долоо хоногт Швейцарьт явж байгаад нэгэн тансаг дэлгүүрт ороод цүнх үзье гэхэд нь худалдагч эмэгтэй жирийн нэгэн америк худалдаад авчих эд бишээ хэмээн үзүүлэхээс татгалзсан явдал тохиожээ. Гурван тэрбумын хөрөнгөтэй хөтлөгч бүсгүй энэ явдлыг арьсны өнгөөр ялгаварласан хэрэг хэмээн гомдоллосон байна. “Ийм явдал Швейцарьт тохиосон гэхэд харамсмаар. Гэхдээ яахав энэ хэрэг улс орон нь ч биш, дэлгүүр ч биш, хувь хүний л араншин л даа. Швейцари надаас уучлал гуйгаад ч хэрэггүй. Нэг хүний өмнөөс бүхэл бүтэн улс орон ичээд яахав. Арьсны өнгөөр ялгаварлах үзэл ер нь янз бүрээр илэрдэг. Дэлгүүрийн ажилтан намайг үнэхээр төлбөрийн чадваргүй гэж бодсон байж болох. Надад ямар ч үнэт эдлэл, чулуу, Лубутений тансаг гутал байгаагүй. Гэхдээ надад харамсалтай л байна” гэж Опра Уинфри хэлжээ.