Диана гүнжийн хайр дурлалын тухай өгүүлэх кино дэлгэцнээ гарахын өмнөхөн уг кино зохиолын гол баатар болох Хаснат Хан олны өмнө гарч ирлээ. Хэвлэлээс аль болох нуугдаж амьдардаг Хаснат Хан эмч зүүн Лондон дахь гэрийнхээ ойролцоо явахдаа паппарацын дуранд өртжээ. Хэдийгээр Диана гүнжтэй үүсгэсэн хайр дурлал нь 17 жилийн өмнө төгсгөл болсон ч гүнжийн хамгийн сүүлчийн хайр дурлал гэдгээрээ тэрээр өдгөө ч хэвлэлийнхний анхааралд байдаг нэгэн. Пакистан гаралтай, эмч мэргэжилтэй түүнд Диана гүнж ухаангүй дурлаж, гэр бүл болохыг хүсч байсан ч Хаснат Хан дэлхий дахинаа алдартай гүнжтэй гэрлэхийг хүсээгүй гэдэг. Тийм ч учраас Диана гүнж түүнд хардах сэтгэл төрүүлэхийн тулд тэрбумтан Доди Аль Файедтай холбогдсон гэлцдэг. Энэ түүхийг өгүүлсэн кино удахгүй үзэгчдийн хүртээл болох гэж байхад Хаснат Хан энэ бол огт үндэслэлгүй, зохиомол түүх дээр үндэслэсэн кино, би хэзээ ч энэ киног хүлээн зөвшөөрөхгүй хэмээн мэдэгдээд байна. Тэрээр хэвлэлийнхний яриад байдаг зүйлийн аль нь ч үнэн биш гэж хэлдэг юм.