Эль Салвадор бол үр хөндөлтийн эсрэг хамгийн чанга хуультайгаараа дэлхийд тэргүүлдэг орон. Энэ оронд хэвлий дэх хүүхдээ золгүйгээр алдсан эмэгтэй ч үр хөндүүлсэн хэмээн сэрдэгдэж ял хүлээдэг байна. Түүний нэг тод жишээ бол Гленда Сиомара Круз юм. Тэрээр 2012 оны аравдугаар сарын 30-ны үүрээр их хэмжээгээр цус алдаад эмнэлэгт хүргэгджээ. Гэтэл эмч нар түүнийг хүүхдээ алдсан байна гэжээ. Хэдийгээр Гленда сүүлийн сард жин нэмж, сарын тэмдэг нь ирээгүйг анзаарсан ч бие давхар болсноо мэдээгүй байжээ. Ингээд биеийн байдал нь хүнд байсан түүнийг дараалан хоёр удаа мэс засалд оруулаад удаагүй байтал хэвлий дэх үрээ санаатайгаар зулбуулсан гэж ял тулган, шууд Сан Сальвадорын хотын гаднах эмэгтэйчүүдийн шоронд аваачиж хорьжээ. Тэрээр санаатайгаар үр хөндүүлээгүй гэдгээ батлах ямар ч нотолгоогүй байсан учир шүүхээс түүнийн нөхрийн хэлсэн үгэнд итгээд шууд л 50 жилийн хорих ял оноосон байна. Сан Салвадорын эмэгтэйчүүдийн хорихт ял эдэлж байгаа эмэгтэйчүүд дунд ч ураг нь санамсаргүй зулбасан 28 эмэгтэй байгаа гэнэ.
Эль Салвадорт 2000-2011 оны хооронд 200 гаруй эмэгтэй үр хөндүүлсэн хэргээр баривчлагдсанаас 26 нь хүн амины хэргээр 12-25 жилийн ял авч, 23 нь үр хөндүүлсэн гэдгээр ял сонсжээ. Ийм хатуу чанга хуультай ч тус улсын хувийн эмнэлгүүдэд жилд хэдэн мянгаар нь үр хөндөх ажилбар хийдэг байна.
Эль Салвадор нь үр хөндөлтийг бүрмөсөн хориглосон дэлхийн таван орны нэг юм. Тус улсаас гадна Никарагуа, Чили, Гондурас, Доминиканд үр хөндүүлэхийг хориглодог. Эдгээр орны хуульд ямар ч тохиолдолд үр хөндүүлэхийг зөвшөөрдөггүй, бүр эмэгтэй хүчирхийлүүлсэн, ураг нь гажигтай байсан ч заавал төрүүлэхийг шаарддаг байна.