Гуравдугаар сарын 8-ны шөнө нисээд сураггүй алга болсон Малайзын иргэний агаарын тээврийн Боинг 777-200 онгоцыг Афганистаны нутагт Кандагар хотоос зүүн өмнө зүгт хөдөөгийн нэгэн зам дээр, далавч нь гэмтээд байна гэж хэвлэлүүд бичиж эхэллээ.
“Московский комсомолец” сонин барууны тусгай албадын эх сурвалжаас авсан мэдээлэлдээ онгоц буух үедээ далавчаа гэмтээсэн, багийн гишүүд, зорчигчид бүгд амьд байна гэжээ. Тэднийг долоон хэсэг болгон хөдөөгийн байшингуудад хорьж байгаа гэнэ.
Зорчигчдоос хятадын 20 мэргэжилтнийг барьцаалан авсан хэмээн хэвлэлд бичсэн байна.

Онгоцыг хэн хулгайлсан бэ?

Энэ талаар г хэвлэл тодорхой дурдаагүй ч хэн нэгний захиалгаар хулгайлсан гэсэн байна. “Московский комсомолец” сонин өөрийн эх сурвалж гээд байгаа “тусгай алба”-аа, мэдээлэл өгсөн эх сурвалж нь аль улсынх болохыг бас дурдаагүй байна.

Эрэл үргэлжилж байна

алга болсон онгоцыг эрж хайх ажил үргэлжилсээр байгаа, осолдоогүй олдож мэднэ гэсэн найдлага бага ч гэсэн байгаа болохоор эрлээ зогсоохгүй гэж Малайзын тээврийн сайд мэдэгдсэн байна.
Гэхдээ тус улсын Засгийн газар гуравдугаар сарын 25-ны өдөр онгоцны бүх зорчигчдыг амь үрэгдсэн хэмээн албан ёсоор зарласан юм.

"Бөгжний эзэн"-ий найруулагч эрэлд оролцоно

Үүнтэй зэрэгцээд сураггүй алга болсон онгоцыг “Бөгжний эзэн” киноны найруулагч Питер Жексоны хувийн Gulfstream G650 онгоц эрлийн ажиллагаанд оролцох болсон байна. Шинэ Зеландын найруулагчийн хэвлэлийн нарийн бичгийн дарга энэ тухай мэдээлээд өөрөө ямар нэгэн тайлбар хийхгүй гэжээ.
Жексоны 80 сая долларын үнэтэй онгоц нь, эрэлд оролцож байгаа арав дахь онгоц болж байгаа юм.
Эрлийн ажиллагаанд энэ дөрөвдүгээр сарын 2-ноос британийн атомын шумбагч хөлөг HMS Tireless оролцож эхэлсэн байна. Мөн 6000 меетрийн гүнд шумбах чадалтай америкийн шумбагч тээсэн австралийн Ocean Shield хөлөг энэтхэгийн далай руу явж байгаа гэнэ.