Украины зүүн мужуудад салан тусгаарлагчид ба Засгийн газрын хүчний хооронд болж байгаа зэвсэгт мөргөлдөөний улмаас орон гэрээ орхин дүрвэсэн хүний тоо 415 мянга 800–д хүрсэн тухай НҮБ-ын Дүрвэгсдийн хэрэг эрхэлсэн Ерөнхий коммисарын удирдах газраас мэдээлэв.

Хамгийн сүүлд хийсэн тодруулгаар зэвсэгт мөргөлдөөн эхэлснээс хойш 190 мянга гаруй хүн улс Украин дотроо нүүн шилжсэн бол 197 мянга 400 хүн дайны хөлөөс зугатан ОХУ руу гарсан. Ахин 14 мянга 600 хүн Украинаас дүрвэн Польш руу, 13 мянга 883 хүн Беларусь руу гарсан байна.
Дүрвэгсдийн хэрэг эрхэлсэн Ерөнхий коммисарын газрын хэвлэлийн төлөөлөгч Ариан Раммери “Шилжилт хөдөлгөөнд орсон хүмүүсийг бүртгэх төвлөрсөн систем байхгүй зарим хүн ерөөсөө бүртгэлд хамрагдааггүй тул тоо үнээс ч их байж магадгүй гэдгийг бид хүлээн зөвшөөрч байна” гэжээ.
Орос руу дүрвэн гарсан бараг 200 мянга гаруй хүний 78 мянга нь цагаачийн статус хүссэн өргөдөл гаргасан аж.
НҮБ энэ сарын таванд мэдэгдэл хийхдээ Украины зүүн мужуудаас 117 мянган хүн орон гэрээ орхин өөр мужууд руу нүүж, 168 мянган хүн Орост түр орогнож байна гэсэн юм. Зэвсэгт мөргөлдөөн эхэлснээс хойш 2000 гаруй хүн алагдаж, 5000 гаруй хүн шархаджээ.