Өнгөрсөн ням гарагт Никарагуагийн нийслэл Манагуагийн нисэх буудлын ойролцоо солир унасан тухай “АР” агентлаг мэдээлж байна. Солирын унасан газар 5 м гүн, 12 м голчтой нүх үүсчээ. Солирын хэлтэрхийг олох, судлах зорилгоор эрдэмтэд, орон нутгийн удирдлагын төлөөлөгч, цэргийнхэн оролцсон тусгай комисс ажиллаж эхэлсэн аж.
Солир хүчтэй дуу гарган унаж, газар сул чичирсэн ч байнга газар хөдлөлт болж байдаг газар амьдардаг хүмүүс бас л нэг газар хөдлөлт гэж бодоод тоогоогүй байна. Солир хүн амьдардаггүй ойн бүсэд унасан тул гэмтэж, шархадсан хүн гараагүй.
Эрдэмтэд энэ солирыг ням гарагийн орой дэлхийд 40 мянган км ойртож өнгөрсөн 20 м-ийн голчтой “2014 RC” астероидын хэлтэрхий гэж үзэж байгаа аж.