Европын холбоо нь манай хойд хөршийг Украины ээдрээг тайлахад хангалттай хүчин чармайлт гаргахгүй байна гэж үзээд нэмэлт хориг арга хэмжээ авахаар боллоо. Энэ хориг арга хэмжээнд өртсөн Оросын банк, компаниудын жагсаалтыг Америкийн “The Wall Street Journal” сонинд нийтэлжээ.

Жагсаалтад газрын тос олборлолтын салбарт ажилладаг төрийн мэдлийн гол гурван компани болох “Газпром нефть”, “Транснефть”, “Роснефть” багтсан байна. Энэ гурван компанийг Европын холбооноос 30-аас илүү хоногийн хугацаатай зээл авахыг хориглож.

Өмнө нь Европын холбооноос 90 хоногоос илүү хугацаатайгаар төлөгдөх зээл авахыг хориглоод байсан төрийн өмчийн “Сбербанк”, “Россельхозбанк”, “Газпромбанк”, “Внешэкономбанк”, “ВТБ” банкуудыг зээлийн хугацааг 30 хоног болгож багасгасан байна.

Батлан хамгаалах салбарт үйл ажиллагаа явуулдаг “Оборонпром”, “ОАК”, Уралвагонзавод” компаниуд Европын холбооноос зээл, санхүүжилт авахыг хориглов. Үүний дээр далайн ёроолоос газрын тос хайх ба олборлох, Арктикт дахь төсөл хэрэгжүүлэх, занарын тос олборлох төсөлд шаардлагатай шинэ гэрээ байгуулахыг хоригложээ. Оросын армид зэвсэг, техник нийлүүлдэг “Сириус”, “Станкоинструмент”, “Калашников” компаниудад цэрэг дайны зориулалтаар давхар ашиглаж болох үйлчилгээ, бүтээгдэхүүн нийлүүлэхийг хориглов. Мөн Путинийг дэмждэг гэж шүүмжлэгдсэн олигархиуд, банкны эзэд, Крым ба Украины зүүн мужуудын удирдлагыг Европын холбооны хилийг давахыг хориглосон байна.
Гэхдээ Европын олон оронд шатдаг нийлүүлдэг шатдаг хийн олборлогч ба экспортлогч компаниудыг энэ хоригт хамааруулаагүй байна.