Камеруны хойд нутагт цөмрөн орж ирсэн “Боко Харам” бүлэглэлийн 100 гаруй алан хядагчийг устгасан тухай тус улсын Засгийн газар мэдээлэв. Хил залгаа Нигериэс орж ирсэн алан хядагчдыг устгасан гэдгийг Засгийн газар онцолсон байна. Өрнөдийн гэсэн юм болгоныг эсэргүүцдэг, лалын шашны хууль дүрмээр амьдардаг улс байгуулахын төлөө тэмцдэг “Боко Харам” бүлэглэл Нигерид үйл ажиллагаа явуулаад удаж байгаа. Сүүлийн үед энэ бүлэглэл үйл ажиллагаагаа эрс идэвэжүүлсэн бөгөөд машин техник худалдан авч хүчээ зузаатгаад Нигерийн зүүн хойд нутагт хоёр ч хотыг эзлэн авчээ. Үүний дараа эзлэн авсан хотуудаас холгүй Камеруны хот, тосгодууд руу дайралт хийхийг завдаад ийнхүү бут ниргүүлсэн бололтой.
Энэ оны дөрөвдүгээр сард “Боко Харам”-ын алан хядагчид сургуулийн сурагч 270 охиныг хулгайлан барьцаалсан явдал дэлхийн нийтийг цочирдуулсан юм. Алан хядагчдын толгойлогч нь охидыг хоригдсон хамсаатнуудаараа солихыг санал болгосон ч Нигерийн Засгийн газар татгалзсан.