Их Британи Умард Ирландын нэгдсэн вант улсын хунтайж Харри 30 насныхаа төрсөн өдрийг тэмдэглэхтэй зэрэгцэн ээжээс нь үлдсэн 13 сая фунтын өв хөрөнгийг өөрийн мэдлээр, өөрөөр хэлбэл хөндлөнгийн хяналтгүйгээр захиран зарцуулах эрхтэй болов.

Диана гүнж өөрийн хоёр хүү Уильям, Харрид тус бүр 6.5 сая фунт өвлүүлэн үлдээгээд 30 нас хүрсний дараа захиран зарцуулах эрх өгчээ. Диана гүнж өөд болсноос хойш 17 жилийн хугацаанд хунтайж нарын хөрөнгийг тусгайлан томилогдсон захирагч нар ухаалгаар удирдсаны хүчинд бараг хоёр дахин арвижуулж 13 сая болгосон байна. 13 сая фунт гэдэг нь ойролцоогоор 21 сая ам.доллар.

Гэхдээ энэ мөнгийг Харри хунтайж бүхлээр нь авахгүй. Өв залгамжилсны татвар, өв хөрөнгийг арвижуулсны татвар өгнө. Эдгээр татварын хэмжээ нийлээд 2.3 сая фунт болно. Тиймээс хунтайжийн хөрөнгө 10.7 сая фунт болж байна.
Урьд нь Британийн армийн ахмад цолтой цэргийн албан хаагч гэдгээрээ Харри жилийн 46 мянган фунтын цалин авдаг байсан бол одоо ийнхүү саятан боллоо.
Тэрээр элдэв дуулиан тарьж шар хэвлэлийн од болдог. Багт наадамд нацист офицерийн дүрэмт хувцас өмссөн, Лас Вегаст шалдан нүцгэн байсан гэх мэт зураг хөргөө сонин хэвлэлээр гаргаж байнга дуулиан тарьдаг. Гэхдээ тэрээр зөвхөн зугаа цэнгэлээр олны анхаарлыг татдаг “эрхийн тэнэг” биш. Армийн албан хаагч тул Афганистан гэх  мэт халуун цэгүүдэд алба хааж дарийн утаа үнэрлэсэн зоригтой эр. Ер нь нийгмийн идэвх­тэй хүн. Саяхан дайн тулаанд шархадсан хөдөл­мөрийн бэрхшээлтэй ахмад дайчдын хамтаар Өмнөд туйлаар аялал хийж олны ан­хаарлыг татаж байлаа. Одоо Африкийн Лесото улсын хунтай­жийн хамтаар хөгжлийн бэрхшээлтэй хүүхдүүдэд зориулсан эмнэлэг барихад оролцож байна. Хаан ширээ залгамжлах уламжлалын дагуу Харри хунтайжид Их Британи Умард Ирландын нэгдсэн вант улсын хааны суудалд суух боломж бараг байхгүй. Өдгөө эсэн мэнд байгаа II Елизаветаг өөд болсны дараа Харригийн эцэг Чарльз хунтайж хаан болох ёстой. Дараа нь Харригийн ах хунтайж Уильям. Уильямын дараа түүний хоёр хүүхэд хаанаар цоллуулсны дараа л Харри хаан болох боломжтой. Иймд дэлхий солиртой мөргөлдөх гэх мэт ер бусын зүйл болоогүй тохиолдолд Харри хунтайжийн нэгэн цагт хаан болно гэсэн магадлал нь бараг 0-тэй тэнцүү гэж болно.