Европыг зорьж явсан хууль бус 250 гаруй цагаачтай усан онгоц Ливийн эрэг орчим живсэн тухай “Reuters” агентлаг мэдээлж байна. Ливийн нийслэл Триполигоос холгүй оршдог Тажур хотын орчим онгоц живжээ. Осол гарсны дараа хэргийн газар ирсэн Ливийн Тэнгисийн цэргийнхэн 26 хүнийг л аварч амжсан байна. “Арабын хувьсгал”-ын дараа Ливи, Тунис, Сири, Египет гэх мэт орноос Европ руу цагаачлах хүсэлтэй хүний тоо огцом нэмэгдсэн юм.
Үүнийг дагаад Итали, Францын эрэгт нууцаар хүрэх гэсэн хууль бус цагаачид бүхий усан онгоц осолдох нь элбэг тохиолдох болсон. Муаммар Каддафи гэх мэт дарангуйлагчдыг эрх барьж байх үед Африкийн бусад улсаас хууль бус цагаачид Европ руу орох бараг боломжгүй байлаа. Учир нь, тэдний байгуулсан нууц албад маш идэвхтэй ажиллаж хууль бус цагаачдыг гаргадаггүй байсан. Харин “Арабын хувьсгал”-аар Каддафи, Мубарак гэх мэт дарангуйлагчийг түлхэн унагаасны дараа тусгай албад нь татан буугдсанаар хууль бус цагаачид чөлөөтэй явах боломж нээгдсэн гэж болно. Үүний дээр Ливи, Сири гэх мэт улсад иргэний дайн дэгдсэнтэй холбоотойгоор дайн дажин, алан хядлагаас зугтан хангалуун амьдралтай Европыг зорих цагаачдын тоо ч эрс нэмэгдсэн.