Манай өмнөд хөрш Хятадад авлигатай тэмцэх ажлын хүрээнд 162 мянган албан тушаалтныг цомхотгон ажлаас нь  халсан байна." Ийн цомхотгох ажил Засгийн газар, мужийн захиргаа болон төрийн бусад байгууллага, санхүүгийн болон сургууль боловсролын байгууллагад боллоо” хэмээн Засгийн газрын илтгэлд тэмдэглжээ. Баримт бичигт энэ цомхотголын ажил зөвхөн хүмүүсийг ажлаас чөлөөлөөд зогсохгүй хууль зөрчиж байгаа төсөв хөрөнгийн зарцуулалтад хяналт тавьж танах болно гэсэн байна.

Хятадад төрийн байгууллагууд сүүлийн үест эдийн засгийн өөрчлөн байгуулалтыг далимдуулан  шинэ байгууллага, хэлтэс тасаг шинээр байгуулах явдал газар аваад байгаа юм. Тухай тухайн эрх баригчид өөрийн мэдлийн хүрээнд ийм байгууллага байгуулан тэндээ төрөл төрөгсдөө ажилд оруулах төдийгүй төрийн унаа машин хэрэглэх төсөв баталж өгдөг болжээ.
Ийм ч учаас энэ арга хэмжээний хүрээнд түшмэлүүдийн унадаг авто машины тоог 120 мянгаар  хорогдуулах арга хэмжээ авсан байна.
ХКН-ын Төв хорооны ерөнхий нарийн бичгийн дарга, БНХАУ-ын дарга Си Зиньпин тэргүүтэй Хятадын удирдлагын “тав дахь үе” Засгийн эрхэнд гарч ирсний дараахан  2012-2013 онд хятадын нам төрийн аппаратын бүхий л түвшинд авлигын эсрэг кампани эхэлж  улам эрчимжиж байгаа юм.
Сүүлийн жилүүдэд төрийн албан хаагч, төрийн өмчит үйлдвэрийн газрын олон зуун менежерийн хэргийг мөрдөн шалгаж нэг хэсгийг нь  шүүхэд шилжүүлсэн юм.
Саяхан ХКН-ын Төв хорооны Улс төрийн товчооны байнгын хорооны гишүүн Жоу Юнканыг авлигын хэргээр мөрдөн шалгаж эхэлсэн бол БНХАУ-ын Цэргийн Зөвлөлийн орлогч, ХКН-ын Төв Хорооны Улс төрийн товчооны  болон нарийн бичгийн дарга нарын газрын гишүүн Сюй Цайхоуг мөн авлигын хэргээр шалгаж байгаа юм. Сюй Цайхоу өмнө нь Хятадын ардын чөлөөлөх армийн Улс төрийн газрын дарга байсан юм.