Мексикийн прокурорын алба гурван долоо хоногийн өмнө Мексикийн Герреро мужийн Игуала хотод болсон жагсаалын дараа сураггүй алга болсон 43 оюутныг олоход бодит тус болох мэдээлэл өгсөн хүнд 110 мянган ам.долларын шагнал өгөхөө амлав. Мөн сураггүй болсон оюутнуудын зургийг орон нутгийн сонин хэвлэлүүдэд гаргаж тараажээ. Үүнтэй зэрэгцэн оюутнуудыг хайж олох нэмэлт арга хэмжээ авахаар болж, Герреро мужийн 14 хот, суурин газрын цагдаа нарыг үүрэгт ажлаас нь чөлөөлөн холбооны цагдаа, үндэсний цэрэгжүүлсэн цагдаагийн ангиудыг орууллаа. Хотын цагдаа нарыг зохион байгуулалттай гэмт хэргийн бүлэглэлүүдтэй хамтран ажилладгийг нотолсон тул ийм арга хэжээ авчээ.
Есдүгээр сарын 26-нд Игуала хотод оюутан сурагчид боловсролын системд явагдаж байгаа шинэчлэлийг эсэргүүцэн жагсаал хийсэн. Тэр үеэр цагдаа нар болон зэвсэглэсэн хэсэг хүн жагсагчдын эсрэг буудаж, зургаан хүний аминд хүрч, 25 хүнийг шархдуулан олон арван оюутныг үл мэдэгдэх зүгт хүчээр авч явсан байна. Анхандаа хүчинд автан явж сураггүй болсон оюутнуудын тоо 50 гараад байсан ч зарим нь хэд хоногийн дараа гэртээ иржээ. Одоогоор сураггүй алга болсон оюутнуудын тоог 43 гэж үзэж байгаа аж. Оюутнуудыг хайх ажиллагаанд арми, цагдаагийн анги нэгтгэлүүд, 17 нисдэг тэрэг, гурван онгоц оролцож байна.