Финландын прокурорын албанаас маш нууц жагсаалтыг хянах, бүрдүүлэх үедээ алдаа гаргасан цагдаагийн гурван ажилтанд ажлын хариуцлага алдсан гэсэн ял тулган шүүхэд өгчээ. Эдгээр гурван цагдаа нь 2013 оны дөрөвдүгээр сард ОХУ-ын Ерөнхийлөгч В.Путинийг онц хүнд гэмт хэрэг үйлдсэн ба үйлдэхэд дэмжлэг үзүүлсэн гэж сэжиглэсэн этгээдүүдийг бүртгэдэг маш нууц жагсаалтад оруулсан байжээ. Энэ тухай Финландын хэвлэл мэдээллийн хэрэгслүүд олж мэдээд янз бүрийн тайлбартай нийтлэл, нэвтрүүлэг гаргаж эхэлсний дараа дэлхий нийтийг хамарсан дуулиан дэгдэж байв. Жишээлэхэд, Финландын “MTV3” суваг нь цагдаа нар Владимир Путинийг зохион байгуулалттай гэмт хэргийн бүлэглэлийн үйл ажиллагаанд дэмжлэг үзүүлсэн гэж сэжиглэж байгаа бөгөөд энэ талаарх мөрдөн байцаалтын тухай мэдээллийг тусгай бэлтгэл хийсэн хэдхэн цагдаа нэвтрэх эрхтэй маш нууц жагсаалтад хадгалагдаж байгаа гэсэн байдаг. Цагдаагийн өндөр албан тушаалтан Путинийг “Шөнийн чоно” нэртэй байкерүүдийн клубийн гишүүдтэй уулзсан тул сэжигтэн болго гэсэн тушаалыг доод шатны хүнд буулгаснаар Ерөнхийлөгчийн нэр хар жагсаалтад орсон аж.

Хил залгадаг, эдийн засгийн нарийн уялдаатай, хүчирхэг хөршийнхөө төрийн тэргүүнийг эрүүгийн хэрэгт сэжиглэн шалгах, нэрийг нь хар жагсаалтад оруулна гэдэг хоёр улсын харилцааг нэлээд эвгүй байдалд оруулж болох үйлдэл. Иймд хэвлэл мэдээллийн хэрэгслүүдээр дуулиант мэдээ цацагдсаны дараа Финландын цагдаа нар алдааг залруулж Путиний нэрийг хасч, албан ёсоор уучлал гуйсны дараа, Финландын Дотоод хэргийн сайд ч Оросын талаас албан ёсоор уучлалт гуйж байв.
Путин энэ хэргийн тухай мэдээг наргиан болгож хүлээж авсан, Финландын талаас ямар нэг тайлбар, хариу өгөхийг шаардаагүй гэдгийг түүний хэвлэлийн төлөөлөгч Песков мэдэгдэж байсан юм.