Хятадын Жухай хотод болж байгаа "Airshow China 2014" үзэсгэлэн худалдааны хүрээнд Пакистаны Цэргийн нисэх хүчин нь Хятадын шинэ үеийн, стеллс технологиор хийгдсэн "FC-31" сөнөөгч онгоц худалдан авах тухай хэлэлцээр хийж байгаа аж.  
"FC-31" сөнөөгч онгоц нь хоёр жилийн өмнө анх олон нийтэд танилцуулж байсан "J-31" онгоцны экспортын хувилбар юм байна. Талууд тохиролцоонд хүрч чадвал Пакистан 30-40 ширхэгийг худалдан авах аж.

"FC-31" нь олон төрлийн, хүнд зэвсэглэлийг тээн олон км-ийн алслалттайгаар байлдааны ажиллагаа явуулах боломжтойн дээр Хятад ба Пакистаны компаниуд хамтран үйлдвэрлэдэг "JF-17 Thunder" сөнөөгч онгоцонд байдаг "РД-93" хөдөлгүүртэй гэдгээрээ пакистанчуудын сэтгэлд ихэд нийцэж байгаа аж.

Пакистаны Цэргийн нисэх хүчний зэвсэглэлд байгаа "JF-17 Thunder" онгоцыг Пакистаны "Pakistan Aeronautical Complex", Хятадын "Chengdu Aerospace Corporation" компаниуд хамтран  онгоцыг үйлдвэрлэдэг. Одоогоор Пакистаны зэвсэглэлд 40 "JF-17 Thunder" онгоц байдаг бөгөөд тоог нь ойрын хугацаанд 150-250 хүргэх төлөвлөгөөтэй байгаа аж.

"JF-17 Thunder" онгоцыг Хятадын зохион бүтээгчид бүтээсэн тул сайжруулах, шинэчлэхтэй холбоотой асуудал дээр пакистанчууд хятадуудтай тохиролцох ёстой. "Airshow China 2014" үзэсгэлэнгийн үеэр пакистанчууд шинэ сөнөөгч онгоц худалдаж авах тухай хэлэлцээр явуулахаас гадна зэвсэглэлдээ байгаа хамтран үйлдвэрлэдэг сөнөөгч онгоцоо "Block II" хувилбарар хүртэл сайжруулах шинэчлэхээр болсноо мэдэгджээ.