Египетийн прокурорын газар тус улсын Ерөнхийлөгч байсан Мухаммед Мурсиг гадаад улсын талд тагнуул хийсэн хэрэгт буруутган цаазаар авах ял оноох гэж байна.
Түүнтэй хамт хамтран зүтгэгч 35 хүнийг  бас ийм  хэрэгт буруутгаж байгаа юм. Прокурор Эмад эль-Шаравийн мэдэгдсэнээр Мурси ерөнхийлөгчийн алба хашиж байхдаа хамтран зүтгэгчидтэйгээ хамт улсын чухал нууц баримтуудыг гадаадын тагнуулын байгууллагууд, үүн дотор Ираны тагнуулуудад шилжүүлж өгсөн гэнэ. Мөн тэднийг Египетэд бий болоод байсан нөхцөл байдлыг намжаахын тулд алан хядагч байгууллагуудтай хамтран ажилласан гэж буруутгаж байгаа юм.
Харин Мурси энэ бүхнийг хүлээн зөвшөөрөхгүй гэж мэдэгдсэн. Шүүхийн дараагийн хуралдаан энэ сарын 26-нд болох юм гэж Ассошиэйтед Пресс агентлаг мэдээлжээ.

Мурси тус улсын тэргүүнээр  сонгогдохын өмнө “Лалын ахан дүүс” байгууллагын тэргүүний орлогч байсан түүнийг 2013 оны долдугаар сарын 3-нд олон нийтийн шаардлагаар Ерөнхийлөгчийн суудлаас огцруулсан юм.
Египетэт экс Ерөнхийлөгч Мурсигийн талынхныг буруутгаж “Лалын ахан дүүс” байгууллагын бараг бүх удирдагчийг оролцуулан Мурсиг дэмжсэн 15 мянга гаруй хүнийг баривчлаад байгаа юм.