Цахилгаангүйгээр хүн төрөлхтнийг төсөөлөх аргагүй болсон. Хүн хар тамхи гэгч зүйлд донтоод хэрэглэхгүйгээр байж сууж чадахгүй болдогтой адил хүн төрөлхтөн цахилгааныг нээж олоод, ашиглаж сураад одоо цахилгаангүйгээр амьдарч чадахгүй болсон. Гэр орны гэрэл, зурагт, компьютерээс эхлээд эмнэлгийн тоног төхөөрөмж, машин, гар утас гээд бүх зүйл цахилгаан дээр тогтдог. Өдөр тутмын, асар их хэрэглээ. Иймд дэлхийн аль орны хүн амын хувьд цахилгааны үнэ ямар байх нь амжиргаатай нь шууд холбоотой маш эмзэг сэдэв. Өнгөрсөн жил Болгар цахилгааныхаа үнийг хоёр дахин нэмсний дараа улс орныг бүхэлд нь хамарсан үймээн, жагсаал болж Засгийн газар нь огцорч байсан нь үүний жишээ.
Уншигч танд Европын орнуудын 1 кВт.цаг цахилгаан эрчим хүчний дундаж үнийг сонирхуулъя.

Рейтинг	Улс	1 кВт.цаг дундаж үнэ /төгрөгөөр/	Иргэдийн дундаж цалин. Ам.доллар
1	Дани	774	4275
2	Герман	760	2894
3	Итали	621	2610
4	Ирланд	612	2916
5	Кипр	585	1854
6	Испани	571,5	2220
7	Португаль	553,5	1090
8	Бельги	535,5	2627
9	Австри	513	2796
10	Швед	499,5	3261
11	Их Британи	486	2883
12	Нидерланд	463,5	2671
13	Грек	450	964
14	Люксембург	441	4230
15	Мальт	427,5	1486
16	Норвеги	418	4900
17	Словени	414	1310
18	Франц	405	3355
19	Финлянд	396	3180
20	Лихтенштейн	391,5	5850
21	Словак	382,5	1013
22	Польш	360	908
23	Латви	346,5	691
24	Литв	337,5	720
25	Хорват	333	959
26	Эстони	333	995
27	Румын	328,5	534
28	Чех	328,5	963
29	Унгар	306	665
30	Турк	301,5	474
31	Албани	292,5	436
32	Исланд	288	2400
33	Черногор	261	661
34	Молдов	229,5	236
35	Болгар	211,5	461
36	Босни ба Герцоговин	202,5	567
37	Македон	198	475
38	Серби	153	585
39	Беларусь	144	521
40	ОХУ	121,5	568
41	Украин	45	192

Улс орны сарын цалингийн тухайд эх сурвалжууд орон болгон дээр янз бүрийн тоо хэлдэг. Зарим нь татвар суутгалаас өмнө буюу бруттогоор зарим татвар суутгал авсны дараа буюу неттогоор бодоод, зарим нь тухай улсын амжиргааны түвшингээр тооцон бодож гаргаж ирэх гээд янз бүр байдаг юм байна. Ямартай ч манай улсын сарын дундаж цалин 786 мянга гэснийг ам.долларыг 1800 гэдэгт хуваавал 436 ам.доллар болж байна. 1 кВт цахилгааны үнийг янз бүрийн эх сурвалжуудад бас л янз бүрээр харуулсан байна. “Улаанбаатар цахилгаан түгээх сүлжээ” компанийн сайтан дээр 150 кВт хүртэлх хэрэглээтэй айл өрхүүд 1 кВт.ц цахилгааныг 85 төгрөг 70 мөнгөөр тооцдог, сарын хэрэглээ нь 150 кВт.ц-аас давдаг өрхийн 1 кВт.ц цахилгааныг 103 төгрөг 60 мөнгөөр тооцдог гэсэн байна. Гэтэл Эрчим хүчний зохицуулах хорооны сайт дээр 150 кВт.ц хүртэлх хэрэглээтэй айл өрхийн 1 кВт.ц цахилгааныг 94 төгрөгөөр тооцогдог бол 150 кВт.ц-аас дээш хэрэглээтэй айл өрхийнхийг 113 төгрөгөөр тооцогдог гэсэн байна.

“Улаанбаатар цахилгаан түгээх сүлжээ” компанийг хэрэглэгчидтэй тулж ажилладаг тул сайт дээрх мэдээллийг нь үнэ гэж үзвэл

Рейтинг	Улс	1 кВт.цаг дундаж үнэ /төгрөгөөр/	Иргэдийн дундаж цалин. Ам.доллараар
?	Монгол	84,70	436

Улс оронд цахилгааны үнэ янз бүр байгаад олон хүчин зүйл нөлөөлжээ. Тухайн улс нөхөн сэргээгддэг, “ногоон” цахилгаан хэдий чинээ их ашиглана тэр хэмжээгээр цахилгааных нь үнэ өндөр болж гарчээ. Жагсаалтын нэгдүгээрт орсон Дани нь цөмийн цахилгаан станцаас татгалзахтай зэрэгцэн нөхөн ногоон цахилгаан станцуудыг дэмжих бодлого явуулж байгаа. Энэ салбар нь зардал ихтэй тул төрөөс тэтгэлэг, дэмжлэг авахаас өөр аргагүй. Иймд иргэд нь цахилгааныхаа үнийг өндөр байлгаж, түүнээс авдаг татвараар ногоон цахилгааны салбараа дэмжихийг өөрсдөө зөвшөөрсөн байдаг. Данид цахилгааны үнийн 60 хувийг улсын татвар эзэлдэг. Герман мөн л цөмийн станцуудаас татгалзан ногоон цахилгаан станцыг дэмжих хөгжүүлэх бодлого явуулж байгаа.

Харин жагсаалтын сүүлд орсон ОХУ, Украин хоёр усан цахилгаан станц, цөмийн цахилгаан станц олон болохоор үнийг ийм хямд байлгах боломжтой байдаг аж. Цахилгааны үнийг багасгахад нөлөөлдөг бас нэг зүйл нь станцуудыг шатдаг хий рүү шилжүүлсэн байдал. Орос нь шатдаг хийн олборлолт нийлүүлэлтээр дэлхийд тэргүүлдэг улсын нэг болохоор энэ байдал мөн л цахилгааны үнийг хямд барихад нөлөөлдөг байх. Мөн цахилгааны үнэ хямд байгаа улсууд иргэдийнхээ амжиргааны түвшинг харгалзан үзэж айл өрхийн цахилгааны үнийг бодлогоор хямд барьж, цахилгаан үйлдвэрлэгчдэд төрөөс татаас үзүүлдэг байна.

Исландын хувьд галт уулын орон гэдэг бөгөөд газрын гүнд халуун усыг түшиглэсэн буюу геотермал цахилгаан станцтай тул цахилгааны үнийг хямд байлгах боломжтой.