Ням гарагт Туркт Ерөнхийлөгч Эрдоганы гол өрсөлдөгч, шүүмжлэгч гэгддэг Фетхулла Гюленийг дэмжигчдийн эсрэг тусгай ажиллагаа явагдаж 20 гаруй хүнийг баривчилсан тухай “Reuters” агентлаг мэдээлж байна. Хүчний байгууллагын хүмүүс Гюллентэй холбоотой үйл ажиллагаа явуулдаг гэгддэг сонин, тв-ийн сувгуудыг хааж баривчилгаа явуулжээ. Ерөнхийлөгч Эрдоган энэ бүх баривчилгааг түүнийг түлхэн унагах зорилго бүхий хуйвалдаан илэрсэнтэй холбоотой гэсэн тайлбар өгөв.

“Zaman” сонин, “Samanyolu” сувгуудын редакцид баривчилгаа болсон байна. “Zaman” сонин редакцийн үүдэнд “Хэвлэлийн эрх чөлөөг хүчээр дарах боломжгүй” гэсэн уриа барьсан цөөн тооны хүн жагсаал хийсэн бол сонины Ерөнхий редактор нь “Та нарын баривчлах гээд байгаа хүн чинь энд байна. Ирээд намайг баривчил” гэж цагдаа нар руу хашхирч байсан тухай “Reuters” агентлаг мэдээлсэн байна.

“TRT Haber”  төрийн сувгийн мэдээлнээр нийт 32 хүн баривчлах ордер өгснөөс 23 хүнийг, түүний дотор цагдаагийн албанд хуучин том алба хашиж байсан хоёр хүнийг баривчлаад байгаа аж.

Фетхулла Гюллен нь орчин үеийн Туркийн хамгийн нэр хүндтэй сэтгэгчдийн нэг, лалын номлогч асан, зохиолч хүн. Тэрээр 1999 онд АНУ руу эмчилгээнд яваад эргэж ирэлгүй үлдсэн юм. Туркийн ирээдүй, улс төрийн тогтолцоо, түүнд лалын шашны гүйцэтгэх үүргийн талаарх маргаан, мэтгэлцээнд идэвхтэй оролцдог.

Түүнийг өөрийн нөлөө, үзэл бодлыг нийгэмд сурталчлан түгээж, улмаар төрийн эрхийг гартаа оруулах зорилгоор Төрийн албадуудын дотор нууц давхар алба байгуулсан гэж Ерөнхийлөгч Эрдоган буруутгадаг. Туркийн тусгай албад Эрдоганы ойрын хүрээллийн хүмүүсийг авлигын хэргээр баривчилсны дараагаар энэ хоёр хүнийг харилцаа огцом муудсан юм. Цагдаа, тусгай албадын явуулсан ажиллагааг Эрдоган өөрийг нь түлхэн унагах зорилготой хуйвалдаан гэж үзээд хүчний байгууллагуудын дунд олон мянган хүнийг хамруулсан “цэвэрлэгээ”, баривчилгаа явуулсан. Энэхүү дуулиан хэргийн улмаас Туркийн Засгийн газрын гурван сайд огцорч, олон мянган цагдаа, зуу гаруй шүүгч албан тушаалаасаа огцорсон юм.