Хятадын ӨМӨЗО-ны Хөлөнбуйр аймгийн Манжуур хот бол  манай өмнөд хөршийн ОХУ, европын орнуудтай харилцах гол хаалга болсон, Орос-хятадын хилээс дөрөвхөн км зайд байдаг аялал жуулчлалын гол бүс болсон хот. Зүүн Азийн томоохон нуурын нэг Далай нуур энэ хотоос ердөө 30 км зайд бий.

1901 онд Орос-Хятадын хэлэлцээрийн дагуу  Хятад-Дорнын төмөр замын ажил дуусч Манжуур муж, Алс дорнодыг холбоход хилийн дэргэд Манжуур өртөө гэж байсан нь аажимдаа энэ хотын эхлэл болжээ.

1992 онд Манжуурыг нээлттэй худалдааны хот болгосноор зөвхөн 1992-1997 онд энэ хотын бүтээн байгуулалтад хоёр тэрбум долларын хөрөнгө оруулжээ.
200 орчим мянган хүн амтай Манжуур хот бол ерөнхийдөө европ архитектураар бүтсэн хот гэж болно. Энэ хотоор хятадын Орос, Зүүн европын орнуудаас оруулж ирдэг барааны 60 хувь нь дамждаг.

Хил дээрх төмөр замын том боомт энэ хотод жил бүрийн хоёрдугаар сард “Манжуурын мөс”, “Цасан наадам” гэдэг фестиваль болдог нь аялагч жуулчдыг ихээр татдаг.