Солонгос соёлыг дэлхий нийтээр түгээн дэлгэрүүлэх аян хэр амжилттай яваа нь тус улсын үндэсний хоол хүнс олон улсын түгээмэл хэрэглэдэг хүнсний нэг болж буйгаас илэрхий харагддаг. Тухайлбал, 2013 оны хоолны топ 10 чиг хандлагын нэгээр Солонгосын кимчи нэрлэгдсэн юм.  Гэвч олон улсын зах зээл дэх кимчиний нийлүүлэлтээр Хятад БНСУ-аас давчихаад байгаа.
Өмнөд Солонгос өнгөрсөн жил 89,2 сая ам.долларын үнэ бүхий кимчи экспортод гаргасан бол Хятадаас импортоор 177,4 сая ам.долларын кимчи худалдан авсан байх юм. Өөрөөр хэлбэл, хятадууд солонгосчуудаас ч их хэмжээгээр кимчи үйлдвэрлэж, төрөлх оронд нь экспортолдог болжээ. Хэдийгээр Хятадад үйлдвэрлэсэн кимчи солонгос үндэснийх нь уламжлалт амт чанартай харьцуулахааргүй өөр ч солонгосчууд БНХАУ-ын үйлдвэрлэлд цохиулаад байгаа гэнэ.  Түүнчлэн Солонгосын шинэ залуу үеийнхний хоолны соёл өөрчлөгдөж байгааг дагаад уламжлалт хоол хүнсний хэрэглээ жил ирэх тусам буурч байгаа юм байна. Гэхдээ л солонгосчууд өдөртөө дор хаяж нэг удаа кимчи иддэг бөгөөд жил бүр хоёр сая тонн кимчи хэрэглэдэг гэсэн тоо байна.