Украины зүүн хэсэгт орших нүүрсний уурхайд метан хий дэлбэрсний улмаас 30 гаруй уурхайчин амиа алджээ. Донецкт орших Засядькогийн уурхайд гарсан энэ осол яг хэдэн хүний аминд хүрсэн тухай баттай мэдээлэл алга байна. Уурхайд тархсан хорт хийг арилгасны дараа аврагчид дотогш нэвтрэх учир гарз хохирлын хэмжээг хараахан тогтоож чадаагүй байгаа аж. Засядькогийн уурхайд 2007 онд мөн л метан дэлбэрч, 101 хүн амиа алдсан маш том осол гарч байсан. Мөн 1999 онд ч томоохон осол гарч, 50 гаруй уурхайчин нас барж, 40 гаруй хүн бэртэж гэмтэж байв. Ердөө хоёр сарын өмнө мөн л энэ уурхайд бөмбөгдөлтийн улмаас цахилгаан нь тасалдаж, 500 гаруй уурхайчин газар дор хашигдаж, томоохон осол гарах дөхсөн юм.