АНУ-ын нийслэл Вашингтон хотод орших томоохон 19 музей, галлерейг хамруулсан Смитсоны музейн групп үзэгч, жуулчдад зориулсан шинэ журам гаргажээ. Энэ журмаар бол үзэгчид сүүлийн үед ихэд дэлгэрээд байгаа селфи зураг авахад ашигладаг урт гар мэтийн техник хэрэгслийг музейд авч орж болохгүй аж.  
Энэ нь нэг талаас үзэгчдээ, нөгөө талаас музейн эд зүйлийг хамгаалахад, нэн ялангуяа олон хүнтэй үед төвөг бэрхшээл үүсгэхгүй гэсэн үүднээс гаргасан журам хэмээн Смитсоны музейн группээс тайлбарласан байна. Селфи буюу гар утас юм уу фото камераар өөрийнхөө зургийг авах трэнд дэлгэрснээр жилдээ хэдэн сая үзэгч, жуулчин хүлээн авдаг үзвэрийн газрууд селфиний талаар шинэ дүрэм журам гаргах болсон. Тухайлбал, Нью-Йоркийн Метрополитан орчин үеийн урлагийн музей, Лос Анжелес дахь “Getty” төв,  Австралийн томоохон галлерей, Английн алдарт О2 төв зэрэг газрууд селфи авах хэрэгслүүдийг хориглоод буй. Харин Европын хувьд Парисын Луврын музейгээс эхлээд ихэнх музей селфиг зөвшөөрч байгаа юм.
Смитсоны музейнууд жилдээ 28 сая үзэгч, жуулчин хүлээн авдаг гэсэн тоо бий.