Сомалийн зэвсэгт бүлэглэлийнхэн Кенийн зүүн хойд нутгийн Гарисса хотын их сургууль руу халдсаны улмаас 147 хүн амь алдлаа хэмээн The New York Times мэдээллээ. Мөн 60 хүн янз бүрийн хэлбэрээр шархдаж гэмтсэн байна.
Хууль сахиулагчид тусгай ажиллагаа явуулан зэвсэглэсэн дөрвөн этгээдийг устгажээ. Сомалийн лалын “Аш-Шабаб” бүлэглэлийн дайчид Garissa University College-ийн дотуур байранд дайран орох үеэр тэнд 400 оюутан байжээ.

Террористууд оюутнуудыг лалын шашинт, лалын бус хэмээн хоёр хувааж тэднийг Коран судраас ишлэл хэлэхийг даалгаж, ишлэл хэлж  чадахгүйг нь шууд буудаж байсан гэж аврагдсан нэг  оюутан ярьжээ.
Сургууль руу зэвсэгт этгээдүүд халдах гэж байгаа тухай урьд нь мэдээлж байсан ч хэн ч түүнийг тоогоогүй гэж оюутнууд ярьж байна.

Зарим эх сурвалжийн мэдээлж байгаагаар зэвсэглэсэн халдлагыг Кенийн иргэн нутгийн нэг сургуулийн захирал байсан Мохаммед Куно гэгч зохион байгуулсан гэнэ. Шейх Махамад, Дулядин болон  Гамадере зэрэг хочоор нэрд гарч, арванхоёрдугаар сараас хойш хууль сахиулагчдаас нуугдаж байгаа Куног барихын тулд 55 мянган доллар амлаад байсан юм.
Нийгэмд шариатын хууль сахиулах зорилготой гэдэг “Аш-Шабаб”  зэвсэгт бүлэглэл өөрсдийгөө “Лалын шүүхийн холбоо” гэдэг байгууллагын залгамжлагч хэмээн 2004 онд байгуулагдсан юм.