БНХАУ-ын прокурор ХКН-ын Төв хорооны Улс төрийн товчооны байнгын хорооны гишүүн, Олон нийтийн аюулгүй байдлын сайд асан Жоу Юнканыг авлигын хэрэгт буруутай гэдгийг албан ёсоор зарлалаа.
БНХАУ-ын нам төрийн өндөр албан тушаалтныг өнгөрсөн оны арванхоёрдугаар сард авлига авсан, албан тушаалаа хэтрүүлсэн, улсын нууц задруулсан хэрэгт сэжиглэн саатуулан шалгаж эхэлсэн юм. Одоо түүний хэрэгт холбоотой байж болох гэр бүл, найз нөхөд,  улстөрийн хамтрагч, ажил хэргийн түнш гээд 300 гаруй хүнийг мөн саатуулан шалгаж, байцааж эхэлжээ. Энэ хэргийн хамтрагчдын авлига, төрийн өмчөөс идэж ашигласан хэмжээ нь 90 тэрбум юань буюу 14,5 тэрбум ам.долараар хэмжигдэж байгаа юм.
Жоу Юнкан БНХАУ-ын Олон нийтийн аюулгүй байдлын сайд болохоосоо өмнө нефтийн аж үйлдвэрийн салбарт удирдах ажил хийж, Хятадын үндэсний нефть хийн корпорацийн ерөнхий захирлын алба хашиж байсан юм.