ОХУ-ын Хакасын бүгд найрамдах улсад ард иргэд хатсан өвсөө шатаах гэж байгаад түймэр дэгдээснээс болж таван хүн нас барж, 117 хүн түлэгдэж гэмтэн эмнэлэгт хандсаны 10 гаруй нь хүнд байгаа юм байна. Түймэр  тус бүгд найрамдах улсын таван районы 21 суурин газарт тархаж 1000 орчим байшин шатжээ.
Түймрийн улмаас одоохондоо үнэлж баршгүй хохирол учраад байна.Салхины хүч 30 метр секундэд хүрч асар их байгаагаас гал асар хурдтай тархаж байна. Одоо түймэр унтраахаар гал унтраах гурван галт тэрэг бүхий 1200 техник,  5180 хүн ажиллаж байна гэж Орон нутгийн Онцгой байдлын газрын төлөөлөгч мэдээлжээ.
Одоогийн байдлаар 18 суурин газрын түймрийг унтрааж, галын бүсээс 400 орчим хүнийг нүүлгэн шилжүүлж түр байгуулсан сууринд шилжүүлээд байгаа юм байна.