Ирак, Сирийн зарим нутагт хяналт тогтоогоод байгаа “Лалын улс” зэвсэгт бүлэглэлийн  удирдагчид нэг жилийн дотор цөмийн зэвсэгтэй болно гэдгээ өөрсдийн гаргадаг Dabiq сэтгүүлд бичсэнийг The Independent хэвлэл мэдээллээ. Сэтгүүл дэх материалыг зэвсэгт дайчдад барьцаалагдаад байгаа британийн иргэн Жон Кантлийн нэрээр тавьжээ.
“Лалын улс” бүлэглэлийн банкны харилцахад тэрбум ам.доллар байгаа. Тэгэхээр тэд Пакистан дахь өөрийн эзэлсэн газар нутаг вилайетэд орон нутгийн авлигад идэгдсэн түшмэлүүдээр дамжуулан цөмийн зэвсэг оруулж ирж чадна” гэж энэ өгүүлэлд бичжээ. Үүнээс гадпна “Лалын улс”-ынхан  тэсрэх бодис бэлтгэхэд хэрэглэдэг аммоны нитрит хэдэн мянган тонныг авахад хөрөнгө зарах чадалтай гэсэн байна. “Бодит довтолгоо” гэсэн нэртэй энэ өгүүлэлд бас “Лалын улс” нь африк дахь “Боко харам” шиг зэвсэгт бүлэглэлүүдтэй нэгдэж илүү хүчирхэг болох тухай ч бичжээ. Тэд танк, пуужингийн суурь, агаараас эсэргүүцэх цогцолбор олзлон авсан гээд нэг жилийн дараа гэхэд илүү их аюултай болно гэж энд өгүүлсэн байна.
“Лалын улс” бүлэглэл иймэрхүү сурталчилгааны материалууддаа тэдэнд хоёр жилийн өмнө олзлогдсон англи эр Жон Кантлийн нэр, зургийг байнга ашигладаг юм. Түүнийг  бас нэг биш удаа дүрс бичлэгт оруулан яриулж  байсан юм.
Иракт 2006 онд үүсч эхэлсэн “Лалын улс” зэвсэгт бүлэглэл нь 2014 оны зунаас Ирак, Сирийн зарим нутгийг эзлэн авч эндээ халифын улс  гэгчээ тунхаглан Мосул хотыг нийслэлээ гэж зарлаад байгаа юм. 2014 оны наймдугаар сараас АНУ тэргүүтэй олон улсын цэргийн хүчин Иракын нутаг дахь  эдний байрлалууд руу цохилт өгч эхэлсэн  бол есдүгээр сараас Срийн нутагт агаараас цохилт өгч байна.