АНУ-ын Үндэсний аюулгүй байдлын агентлаг Францын ерөнхийлөгчдийн утасны яриаг чагнаж байсан гэсэн баримтыг нэрд гарсан Викиликс сайт дэлгэж дуулаин атрилаа. Америкийн тусгай алба дэлхийн тав дахь гүрэн Францын төрийн тэргүүнүүдийг  сүүлийн 10 жил тагнаж байсан гэсэн нь Жак Ширак, Николь Саркози, өнөөгийн ерөнхийлөгч Франсуа Олландыг чагнаж байсан гэсэн үг. Мөн АНУ-д суугаа Францын Элчин сайдыг ч бас чагнаж байжээ.

Викиликсийн дэлгэсэн баримтаар бол энэ хүмүүсийн сүүлийн 10 жилийн ярианы бичлэг байгаа гэнэ. Энд Францын дотоод улс төр, ялангуяа улсын чухал албануудад хийсэн томилгооны тухай, албан тушаалтнуудыг дэвшүүлэх тухай асуудлууд байгаагаас гадна дэлхийн санхүүгийн хямралтай холбоотой, Европын холбооны ирээдүйн тухай, Парис-Берлины харилцаа гээд олон улсын чухал ярианы бичлэг бий гэжээ.

Франсуа Олланд германы канцлер Ангела Меркелийн араар сөрөг хүчнийхэнтэй нь уулзаж байсныг хүртэл дурдсан байна.
“Парист болсон энэ нууц уулзалтад францын эрх баригчид немцийн Социал демократ намын гишүүдтэй уулзсан. Ерөнхий сайд Эйро ерөнхийлөгчдөө дипломат асуудал үүсэхээс сэргийлж, уулзалтыг маш нууц байдал хийхийг сануулж байсан” гэж Викиликс иш татжээ.
Тагнуулын материалд францын сайдууд, ерөнхийлөгчийн зөвлөх, засаг захиргааны ажилтнууд, ерөнхийлөгч Франсуа Олландын утасны дугаарыг дэлгэсэн байна. Ерөнхийлөгч Олланд бүр гурван жилийн өмнө Грекийг Европын холбооноос гаргахад бэлтгэж байсан ярианы бичлэг ч байгаа юм байна.

Харин Цагаан ордны Үндэсний аюулгүй байдлын зөвлөлийн албан ёсны төлөөлөгч Нед Прайс үүнийг няцааж америкийн тусгай алба Францын ерөнхийлөгч Франсуа Олландын утасны яриаг чагнаагүй гэж мэдэгдээд байна.
Харин Францын ерөнхийлөгч Франсуа Олланд энэ дуулиантай холбогдуулан лхагва гарагт Үндэсний аюулгүй байдлын зөвлөлөө яаралтай хуралдуулжээ.