Америкийн саятан, еврей гаралтай Жейсон Бузи дэлхийн улс орнуудаас дүрвэж яваа хүмүүст зориулж тусгай улс байгуулах санал гаргалаа. Тэрээр өөрийн “Дүрвэгч үндэстэн” гэдэг төсөлдөө манай гаригийн улс орнуудын ашиглахгүй байгаа газар нутгийг юм уу, далай дахь эзэнгүй арлыг дүрвэгсдэд зориулсан улс болгож болох юм гэсэн санал дэвшүүлжээ.
Индонези ч юм уу, Доминизан шиг газар нутгаа худалдах саналтай улс орны газар нутгаас худалдаж авч болох юм, ингэвэл дэлхийн улс орнуудаас дүрвэж яваа 59,5 сая дүрвэгсэд өөрийн гэсэн улс, гэр оронтой болох боломж бүрдэнэ гэж тэр найдаж байна.
Ийм бэлээхэн түүх, туршлага бол сүүлийн зуун жилд Израиль байна гэж саятан эр хэлжээ. “Израиль бол ердөө л еврейн дүрвэгсдэд зориулан бий болсон улс” гэж Бузи хэлсэн байна.
Тэр бас өнөөдөр дэлхий даяар өөрийн улс орондоо амьдрах аргагүй болж хүний нутаг, гүний хошуу дамжин яваа дүрвэгсдийн асуудлыг шийдэх ганц арга бол энэ гэж тэмдэглэжээ.
Энэ шинэ төслөө хэрэгжүүлэхээр шинэ сайт нээхэд зориулан саятан өөрөө 15 мянган доллар зарцуулсан байна.