Свазилендын хааны гэр бүлээс жил бүр зохион байгуулдаг шинэ эхнэр сонгох бүжгийн баярт оролцохоор явсан бүсгүйчүүд осолд орж 38 бүсгүй амь алдан өөр 20 хүүхэн хүнд гэмтэл авсан эмгэнэлт явдал гарлаа гэж Associated Press агентлаг мэдээлжээ.
Наймдугаар сарын 28-нд залуу бүсгүйчүүд, охидыг  ачиж явсан ачааны машин өмнөөсөө ирж явсан бичил автобустай мөргөлдөж, араас нь хүнд ачааны машин мөргөснөөр ийм эмгэнэлт явдал гарсан байна.

Хааны гэр бүлд зохиодог Умхланга гэдэг бүжгийн энэ баярт хэдэн мянган бүсгүй ирж хагас нүцгэлэн бүжих үеэр эзэн хаан шинэ эхнэр сонгон авдаг уламжлалтай. Энэ жилийн баярт 40 мянган залуу бүсгүй оролцож хааны эхнэр болохоор азаа үзэх юм гэж Свазилендын засгийн газрын сайтад мэдээлжээ.

                                Хаан Мсавати III  бүжгийн баяр дээр нэг эхнэртэйгээ

Өмнөд Африк дахь хамгийн сүүлчийн хэмжээгүй эрхт эзэн хаан Свазилендын хаан Мсавати III төрийн бүхий л эрх мэдлийг гартаа барьдаг. Свазиленд энэ тивийн хамгийн ядуу орон гэлээ ч эзэн хааны нь хувийн хөрөнгө 200 сая доллараар хэмжигддэг байна. Мсавати III хаан 15 эхнэр 25 хүүхэдтэй юм.