Дэлхий даяар цагаачлан амьдрагсдын тоо сүүлийн 15 жилд 41 хувь өсч 2015 онд 244 саяд хүрлээ, эдний дотор 20 сая дүрвэгч байна гэж НҮБ мэдээллээ.

НҮБ-ын Ерөнхий нарийн бичгийн даргын Эдийн засаг нийгмийн асуудал хариуцсан орлогч У Хонбо “Олон улсын энэ цагаачлалын давалгаа нь манай эдийн засаг, нийгмийн салшгүй чухал хэсэг болж байна” гэж тэмдэглэсэн байна.
“Цагаачлалын урсгалыг сайн зохион байгуулж удирдах нь цагаачлагчид, тэдний гэр бүлд төдийгүй тухайн улс орнуудад маш их ашигтай болно” гэж тэр хэлжээ.

НҮБ-ын мэдээлэлд цагаачлагчдын тоо ингэж өсч байгаа нь дэлхийн хүн ам өсч байгаатай холбоотой гэсэн байна. 2000 онд дэлхий даяар цагаачлагчдын тоо нийт хүн амын 2,8 хувь байсан бол 2015 онд энэ үзүүлэлт 3,3 хувь болж өсчээ.

Европ, Умард Америк, далайн орнуудад цагаачлан очигсдын тоо энэ орнуудын хүн амын 10 хувь болж байна. Харин Ази Африк, латин Америкт энэ үзүүлэлт дөнгөж хоёр хувьтай байна.

НҮБ-ын Ерөнхий нарийн бичгийн дарга Бан Ги Мун олон улсын цагаач, дүрвэгчийн асуудлаар нарийн төлөвлөгөө боловсруулах хэрэгтэй байгааг өнгөрсөн оны арваннэгдүгээр сард мэдэгдсэний дагуу НҮБ-ын Ерөнхий Ассамблей энэ оны есдүгээр сарын 19-нд энэ асуудлаар дээд хэмжээний уулзалт зохион байгуулахаар төлөвлөжээ.