Францын “Air France” компанийн онгоцоор Парисаас Ливан руу нисч явсан зорчигчид ер бусын хачирхалтай хүсэлт онгоцны ахмадаас хүлээн авчээ. 562 дугаар нислэгийг удирдаж явсан онгоцны ахмад эхлээд Ливаны нийслэл Бейрут хотод байдал тогтворгүй байгаа тул замдаа Сирийн Дамаск хотод түр газардах хэрэгтэй болсныг мэдэгджээ. Гэтэл эмх замбараагүй байдлын хувьд Бейрутаас дор, бүр иргэний дайнтай байгаа Сирид газардах болсон нь онгоц цааш нисэх түлшгүй болсонтой холбоотой байж. Онгоц Дамаск хотод газардсаны дараа ахмад түлшгүй болсон үнэн учраа зорчигчдод хэлж, өөрт байгаа бэлэн мөнгөнүүдээ цуглуулж өгөхийг хүсчээ. Учир нь, олон улсын хориг санкцаас үүдэн Францтай харилцаагаа таслачихаад байгаа Сирийн тал “Air France”-ийн онгоцонд кредит картаар түлш олгохгүй гэж зөрүүдэлсэн байна. Гарах гарцгүй болсон онгоцны ахмад эцэст нь зорчигчдодоо хандаж, тэдний бэлэн мөнгөний боломж хэд байгааг асууж үзжээ. Гэвч  хоёр цагийн дараа “Air France”-ийн удирдлагууд зорчигчдоосоо мөнгө авалгүйгээр асуудлыг шийдэж чадсан гэнэ. Тус компанийн хэвлэлийн төлөөлөгч онгоцны шатахуун хэдий хэр өртөгтэй байсныг нууцалж буй ч АНУ-ын “ABC” телевизийн мэдээлж буйгаар онгоцыг цэнэглэхийн тулд 17 мянган ам.доллар хэрэгтэй байсан бөгөөд зорчигчдоос нь төдий хэмжээний бэлэн мөнгө цугларахааргүй байжээ. Ямартай ч онгоц Дамаск хотод хоёр цаг саатсаны эцэст зорьсон газраа аюулгүй хүрч очжээ.