Улсын онцгой комисс ээлжит хуралдаанаа өргөтгөсөн байдлаар Төрийн ордны "Б" танхимд зохион байгуулагдаж буй. Тус хуралд Ерөнхий сайд У.Хүрэлсүх оролцож үүрэг даалгавар өглөө. Ямар үүрэг даалгавар өгсөн талаарх мэдээллийг тоймлон хүргэвэл “Коронавируст цар тахлаас урьдчилан сэргийлэх хуулийг сайтар сурталчлах хэрэгтэй байна. Эрсдэлтэй нөхцөлд ажиллаж байгаа эмч, мэргэжилтнүүдийнхээ аюулгүй байдлыг хангахаас гадна энэ хүмүүсийн ар гэрт мөнгөн урамшуулал олгох асуудлыг судалж УОК-д танилцуулахыг үүрэг болгож байна.
Мөн аймаг орон нутагт эрсдлийн үнэлгээ хийх шаардлагатай. Аймаг нийслэл сумдын онцгой комиссын дарга нарт бэлэн байдлаа хангахыг үүрэг болгож байна” гэсэн юм. Мөн тэрбээр “Хилээ хэзээ нээх талаар хүмүүс их асууж байна. Хилийг нээхгүй. Хэзээ нээхийг хэлж мэдэхгүй байна. Вакцин эм тариа гарсан үед өндөржүүлсэн бэлэн байдал зогсоно. Амар амгалан амьдарна. Тэр хүртлээ хатуу чанд шаардлага тавьж ажиллах болно.
Сахилга бат, дэг журамтай байж халдвараас бид өөрсдийгөө хамгаалах болно. Аюулгүй байдлаа хамгаалах үүднээс амны хаалтаа тогтмол зүүх хэрэгтэй байна” гэсэн юм.
