“Саналын хуудсыг хэвлүүлэх, хүргүүлэх, хадгалах, хамгаалах журам”-д заасны дагуу УИХ-ын 2020 оны ээлжит сонгуулийн саналын хуудас хэвлэх ажлыг эхлүүлээд байна. Улсын бүртгэлийн байгууллагаас ирүүлсэн сонгогчийн тоонд үндэслэн хэвлүүлэх саналын хуудасны тоог баталдаг. Энэ удаад сонгогчдын нэрийн жагсаалтад хоёр сая 132 мянга 239 сонгогч бүртгэгдсэн байна. Ийнхүү саналын хуудсыг таван хувийн нөөцтэй хэвлүүлж байгаа аж. Мөн “Монголын үнэт цаас хэвлэл” ХХК, “Таван богд менежмент” ХХК-иудад саналын хуудсыг хэвлүүлэхээр шийдвэрлэжээ. Сонгон шалгаруулахдаа хэвлэх үйлдвэрийн хүчин чадал, стандарт, зай талбай, аюулгүй ажиллагаа, хамгаалалт, хадгалалтын асуудлууд дээр тодорхой шалгуурууд тавьж мэргэжлийн байгууллагуудаар дүгнэлт гаргуулдаг байна.