Эрүүл мэндийн сайд хэн байх вэ гэдэг таамаг хэд хоног сошиал ертөнцөд хүчээ авч, нийгмийг талцуулсан сэдэв байж чадлаа. Зарим нь УИХ-ын гишүүн Ж.Чинбүрэнг Эрүүл мэндийн сайд болох ёстой гэсэн бол хэсэг бүлэг хүмүүс УИХ-ын гишүүн Д.Сарангэрэлийг хэвээр нь үлдээж ажиллуулах ёстой гэх мэтээр өөр өөрсдийн байр сууриа илэрхийлж байв. Тэгвэл нийгмийн талцуулж буй энэ сэдвийн талаар УИХ-ын гишүүн Ж.Чинбүрэн өөрийн байр сууриа цахим хаягаараа дамжуулан илэрхийлжээ.

Тэрбээр “Цахим сүлжээнд шинээр томилогдох Эрүүл мэндийн сайдын талаар багагүй маргаан мэтгэлцээн өрнөж байна. Намайг дэмжиж, санал бодлоо илэрхийлсэн бүх хүнд баярлалаа. Миний бие хэнд ч захиалга өгөөгүй, намайг сайдын суудалд дэмжээрэй гэж гуйж гүйгээгүй. Хэнийг аль салбарт сайдаар томилох нь зөвхөн Ерөнхий сайдын бүрэн эрх гэдгийг хүндэтгэн үзэхийг уриалж байна.
Би давхар дээл өмсөх хүсэл сонирхолгүйгээ мэдэгдье. УИХ-ын гишүүний үүргээ биелүүлж, элэг бүтэн Монголын төлөө төрийн бодлого барилцаж, хууль санаачилж, хяналтаа тавьж хичээн зүтгэх болно.
Элэг бүтэн Монгол Улсын төлөө зүтгэе!” гэжээ.