Монгол Улсын Шадар сайд Я.Содбаатар ОХУ-ын Элчин сайд И.К.Азизовыг хүлээн авч уулзлаа. Монгол, Оросын иж бүрэн стратегийн түншлэлийн харилцаа, хамтын ажиллагаа бүхий л салбарт амжилттай хөгжиж буйд сэтгэл хангалуун байгаа гэдгээ Шадар сайд илэрхийллээ.
2021 онд тэмдэглэлт ой, арга хэмжээгээр дүүрэн жил болох гэж байна. Ирэх жил Ардын хувьсгалын 100, Монгол Улс, ОХУ-ын хооронд дипломат харилцаа тогтоосны 100, Монгол хүн сансарт ниссэний 40 жилийн ой тус тус тохиож байгаа. Дипломат харилцааны 100 жилийн ойг манай улсад тэмдэглэн өнгөрүүлэх ажлын төлөвлөгөөг баталсан.
100 жилийн ойг тохиолдуулан “Монгол, Оросын санаачилга - 2021” арга хэмжээг хамтран зохион байгуулах, тэр үеэр бизнес форум, үзэсгэлэн худалдаа хийхээр оросын талтай хамтран ажиллах төлөвтэй байгаа тул Элчин сайдыг бүх талаар дэмжиж ажиллахыг хүслээ.
Манай хоёр улсын худалдаа, эдийн засгийн харилцаанд Худалдааны төлөөлөгчийн газрын институцийн үйл ажиллагаа сэргэж байгаад сэтгэл хангалуун байгааг Шадар сайд дурдсан. Худалдааны төлөөлөгчийн газрууд Монгол, Оросын худалдаа, хөрөнгө оруулалтын хөгжилд тодорхой нааштай өөрчлөлт авчрах ёстой гэж харж байна. Улаанбаатар дахь Оросын Худалдааны төлөөлөгчийн газрын үйл ажиллагааг бүх талаар дэмжиж байгаа гэдгээ ч илэрхийллээ.
Монгол Улсын Шадар сайдын Ажлын алба
