УДЭТ-ынхан 40-өөд хүний бүрэлдэхүүнтэйгээр ирэх сарын 7-нд орон нутгийн үзэгчдэдээ уран бүтээлээ хүргэхээр аян замдаа  гарах гэж байна. Энэ удаа баруун бүсийн Говь-Алтай, Баян-Өлгий, Өвөрхангай, Баянхонгор, Ховд аймгаар явах аж. УДЭТ нь хөдөө, орон нутгийн үзэгчдэдээ зориулж Б.Лхагвасүрэнгийн “Тамгагүй төр”, Д.Мэндсайханы “Ээжээ”, Ч.Ганхуягийн “Эхнэрээ зээлээч”, Ш.Гүрбазарын “Надаар тоглосон хайр” зэрэг жүжгээ тоглох бөгөөд хүүхэд багачууддаа зориулан С.Мехалковын “Бардам туулай” жүжгээр бэлэг барих юм. Аялан тоглолтын бригадын бүрэлдэхүүнийг ардын жүжигчин Г.Мягмарнаран ахлах бөгөөд ардын жүжигчин П.Цэрэндавга, гавьяат жүжигчин Г.Равдан, С.Сарантуяа, СТА Ч.Түвшин, Э.Батхүү, Б.Отгонбат, Б.Эрдэнэцэцэг, Б.Нармандах, Д.Ганцэцэг, Ц.Баясгалан, Г.Амгаланбаатар нараас гадна залуу уран бүтээлчид багтжээ.