“Атар-Өргөө” ХК-ийн ТУЗ хувьцаа эзэмшигчдийн ээлжит хурал дөрөвдүгээр сарын 28-нд болсон бөгөөд Хувьцаа эзэмшигчдийн хурлын тооллогын комисс компанийн хувьд нэлээдгүй өндөр хувьцаа эзэмшиж буй нэр бүхий хоёр иргэний хувьцааг саналын эрхгүй гэж үзэн, хуралд оролцуулахгүй байх тогтоол гаргажээ.
Үүнтэй холбогдуулан дээрх хоёр иргэн СЗХ-нд гомдол гаргасан ба энэ асуудлаар СЗХ-ны Хяналт шалгалт, зохицуулалтын газар шалгалт хийхэд тус компанийн Хувьцаа эзэмшигчдийн хурлын тооллогын комисс Хувьцаа эзэмшигчид тэр дундаа жижиг хувьцаа эзэмшигчдийг оролцуулаагүйгээр барахгүй санал өгөх эрхгүй хэмээн хууль бус шийдвэр гаргасан болох нь тогтоогдсон байна. Иймээс СЗХ-оос дээрх ээлжит хурлыг хүчин төгөлдөр бус хэмээн үзэж, “Атар-Өргөө” ХК-д хувьцаа эзэмшигчдийн ээлжит бус хурлыг дахин зарлах үүрэг өгч, албан бичиг илгээсэн байдаг.
Ингэснээр “Атар Өргөө” ХК-ийн 2023 оны 04 сарын 28 ны өдрийн ээлжит хурал хүчин төгөлдөр бус болж, Компанийн тухай хуулийн 75.6-д заасны дагуу “Атар Өргөө” ХК-ийн ТУЗ нь бүрэн эрхээ хэрэгжүүлэх чадваргүй болж байгаа юм. Иймд бүрэн эрх нь дуусгавар болсон Төлөөлөн удирдах зөвлөлийн шийдвэрийн улмаас хувьцаат компанид, цаашлаад хувьцаа эзэмшигчдэд, хөрөнгө оруулагчдын хөрөнгөд мөн харилцагч бусад иргэд, бизнесийн байгууллагууд хохирох эрсдэлтэй нөхцөл байдал үүсээд байна.
