Хэдийгээр С.Чулууныг бусдын оюуны бүтээлийг хуулбарлаж, бүтээлийн жагсаалтаа хуурамчаар үйлдэн, оюуны өмчийг зөвшөөрөлгүй хуулбарласан гэх мэдээлэл цацагдсан ч тус холбооны дүрэм журмын дагуу ээлжит хүнийг томилсон гэдэг мэдээллийг эрдэмтэн судлаачид өгөв.

Монголд Олон улсын монголч эрдэмтний XII их хурлыг Ерөнхийлөгчийн ивээл дор зохион байгуулж буй. “Монголын энх тайван ба түүхэн туршлага” сэдвийн хүрээнд иххуралд оролцохоор дэлхийн 27 орны 500 гаруй эрдэмтэн судлаач хүрэлцэн ирж, оролцож байна.

Монгол хэл бичгийн эрдэмтдийн анхдугаар их хурлыг 1959 онд Улаанбаатар хотод зохион байгуулж байв. Тухайн үед Монголын шинжлэх ухааны академийн дэргэд 1970 онд академич Б.Ширэндэвээр ахлуулсан хэл бичгийн эрдэмтдийн их хурал зохион байгуулах байнгын хороо байгуулсан байна. Байнгын хороо хэд хэдэн удаа хурал зохион байгуулж, 1987 онд болсон монголч эрдэмтдийн тавдугаар их хурлаас Олон улсын монгол судлалын холбоо (ОУМСХ)-г байгуулж, тухайн үеийн Сайд нарын зөвлөл албажуулж тогтоол гаргаж байжээ.

Өөрөөр хэлбэл, Монгол Улсын төрөөс энэ холбоог анх байгуулж, одоо төрийн бус байгууллагын хуулийн дагуу үйл ажиллагаа явуулдаг бие даасан байгууллага болжээ.

Энэ холбоонд дэлхийн 40 орчим орны 600 гаруй судлаач гишүүнчлэлтэй байдаг аж. Холбооны ерөнхийлөгчөөр нь Унгар улсын эрдэмтэн Бирталан Агнеш ажиллаж байна.