Зэвсэгт хүчний 326 дугаар ангид алба хааж байсан 21-настай цэрэг энэ сарын 13-нд амь насаа алдсан харамсалтай хэрэг гарсан. Уг хэрэгтэй холбогдуулан цэргийн ангийн камерын бичлэгийг өнөөдөр талийгаачийн ар гэрийнхэнд үзүүлэхээр болсон. Харин ар гэрийнхэн нь камерийн бичлэгийг үзэхээс түр хугацаанд татгалзжээ. Энэ талаараа талийгаачийн аав хэлэхдээ "20 гаруй хоногийн бичлэгийг үзэхэд олон хоног шаардагдах юм байна. Тиймээс би өөрийн хүсэлтээр хойшлууллаа. Ажил явдлаа дуусгаад бүх бичлэгийг нь үзнэ. Бичлэг үзэхээр бол гарын үсэг зур гэсэн. Тийм учраас бичлэг үзсэнгүй. Би гомдолтой байна. Би эрүүл хүүгээ явуулсан. Эрүүл хүүхдээ хүлээж авах ёстой байсан. Цэргийн шалгалтаар миний хүүг эрүүл гээд аваад явсан. Хэлснээр нь бүгд камерын бичлэгт байгаа бол би камер, задлан шинжилгээний хариу хоёрт итгэнэ” гэв.

Мөн тэдний өмгөөлөгч П.Эрхэмбаяр "Өнөөдөр хохирогчийн хууль ёсны албан төлөөлөгчөөр түүний аав У.Ганбатыг томиллоо. Хэрэг хянан шийдвэрлэх ажиллагаанд эхний мэдүүлгийг өглөө. Цагдаагийн байгууллагаас камерын бичлэгт үзлэг хийхэд оролцох боломжоор хангалаа. Маш олон цагаар үзэх шаардлага гарч байгаа тул бичлэг үзэхээс татгалзлаа. Бичлэгийг бүр мөсөн үзэхээс татгалзаж байна гэсэн үг биш. Шүүх рүү хэрэг шилжихээс өмнө хавтаст хэрэгтэй бүгдтэй нь танилцана. Өмгөөлөгчийн зүгээс есөн хүсэлт гаргасан.

Ор, хөнжил, гутал хувцаснаас эхлээд бүх хэрэглэлд нь үзлэг хийх, хавтаст хэрэгтэй холбоотой бүх материалуудыг аюулгүй хадгалах хүсэлт гаргасан. Мөрдөн шалгах ажиллагаанд хохирогчийн аав бид хоёр хоёул оролцогч болсон тул үүнээс цааш мэдээлэл өгөх боломжгүй. Хэрэг шүүх рүү шилжсэн үед нууц биш болно. Тэр болтол эндээс олж авсан бичлэг, зургийг гаргаж тавибал гэмт хэрэгтэн болно. Камерын 20 гаруй хоногийн бичлэг үзнэ. Олон цаг шаардлагатай. Ажил явдалтай учраас бид үзэх боломжгүй гээд нууцын баталгаан дээр гарын үсэг зурахаас татгалзсан. Шүүх шинжилгээний хариу 14 хоногийн дотор гарах ёстой” гэлээ.