Испанийн хэвлэлийн зах зээлд нэгэн шинэхэн сэтгүүл хүч түрэн орж ирж байгааг Нью-Йорк таймс сонин өөрийн блогтоо бичжээ. Сонирхолтой нь, тэрхүү сэтгүүл “Mongolia” гэдэг нэртэй гэнэ.  Хэдийгээр сэтгүүл Монгол гэдэг нэртэй боловч Монголын тухай хэвлэл биш бөгөөд эрхлэн гаргачид нь ч Монголтой холбоогүй аж. Шог хошин маягаар нийтлэл, уран бүтээлээ бичдэг, улс төрийн хошин зураг нийтэлдэг уг сэтгүүл улс орных нь эдийн засаг хүнд, хүн ардынх нь сэтгэл санаа тавгүй байгаа энэ үед уншигчдадаа бага ч болов сэтгэлийн тайвшрал, инээд бэлэглэх нийтлэлийн бодлого барьдаг байна.  
Тийм ч учраас өнгөрсөн гуравдугаар сард анхны дугаараа гаргаж эхэлсэн тус сэтгүүл өдгөө 40 мянган захиалагчтай болж, өдөр ирэх тусам хүрээгээ тэлж байгаа гэнэ.  Сэтгүүлийг эрхлэн гаргагчид “Манай уншигчид бол идеалист, өөрчлөлтөөр өлсч цангаж байгаа хүмүүс” хэмээн Нью-Йорк Таймст ярьсан байна.
“ Mongolia” сэтгүүлийн нийтлэлийн агуулга нь бүхэлдээ улс төрийн шог бөгөөд эдийн засгийн хямралаас үүдээд олныг бухимдуулаад байгаа таагүй үйл явдлуудыг шог хошин байдлаар бичиж, нэг талаар улстөрчид, эрх баригчдыг ичээх, нөгөө талаас нийгмийн стрессийг хөнгөлөх зорилготой ажээ.