Монгол Улсын гавьяат жүжигчин С.Сарантуяа Ардын жүжигчин цол тэмдгээр энгэрээ мялаасан юм. Түүний баярын сэтгэгдэлээс хуваацлаа.

-Юуны өмнө Ардын жүжигчин цол тэмдгээр энгэрээ мялаасанд баяр хүргэе?
-За, баярлалаа. Хамгийн аз жаргалтай, хамгийн сайхан өдөр гэвэл өнөөдрийг хэлнэ. Үндэсний бахархал болсон энэ түүхт ойн өдөр театрынхаа хамт олныг төлөөлөн энэ нэр хүндтэй шагналыг авсандаа үгээр хэлэмгүй сайхан мэдрэмж төрж, аз жаргалыг мэдэрч байна. Сая надтай хамт эмч, багш, жолооч, малчин гээд бүхий л салбарын төлөөлөл шагнал авлаа. Энэ сайхан хүмүүсийн нэг болсондоо маш их баяртай байна.
-Театрын алтан тайзнаа гараад хэдэн жил болж байна вэ?
-1980 онд Багшийн дээд сургуулийн кино драмын ангийг төгссөн. Тэр цагаас хойш 30 гаруй жил тасралтгүй урлагийн алтан тайзнаа ажиллаж, уран бүтээлээ туурвиж явна даа.
-Энэ сайхан шагналыг авсан даруйдаа анх бүтээж байсан дүрээ эргэн дурсвал сонин байх?
-Тэгэлгүй яахав. Миний хамгийн анхны дүр бол эрдэмтэн зохиолч Оюун гуайн “Ширүүн тулааны өмнө” жүжгийн Бурмаа бүсгүйн дүр байлаа. Тэр цагаас хойш эдүгээ 30 жил өнгөрчээ.
-Нэг дүрд тоглох нь хүүхэд төрүүлэхтэй адил гэдэг. Та өнгөрсөн хугацаанд хэчнээн хүүхэд “өлгийдөж” авсан бэ?
-Яг ч тоолж үзэж байгаагүй юм байна. Гэхдээ өнгөрсөн 30 жилээ эргээд барагцаагаар тоолоход 100 гаруй дүрийг театрын алтан тайзнаа амилуулсан юм байна. Өнөөдрийн энэ шагнал ч гэсэн үүнийг маань үнэлсэн зүйл боллоо.