Өнөөдөр "Түмэн хишигтэн" төслийн багийнхан Цонжин болдогт эрдэм шинжилгээний хурал хийлээ. Хурлын гол зорилго нь монгол хүнийг төлөвшүүлэхэд эх түүхийн үүрэг нөлөөг нэмэгдүүлэх, хойч үедээ Их эзэнт гүрний түүх, өв соёлыг шинжлэх ухааны үндэслэлтэй мэдүүлэх, өвлүүлэн улдээх, тэдгээрийг бодит бүтээн байгуулалтаар харуулах их ажилд хувь нэмрээ оруулахад оршиж байгаа юм.
Найман зууны тэртээх өвөг дээдсийн сүр хүч, Монголчууд бидний хийморь бахархлыг түүхийн хуудаснаас амилуулсан хүн төрөлхтөнд үеийн үед дамжин үлдэх бодит бүтээн байгуулалтыг "Түмэн хишигтэн" төсөл эхлүүлж байгаа юм.
"Түмэн хишигтэн цогцолбор" нь Улаанбаатар хотоос 53 км зайтай Төв аймгийн Эрдэнэ сумын нутаг Цонжин болдогоос баруун тийш Агуйт уулын энгэр хэмээх түүхэн газар байрлана. Цогцолбор нь нийт 140 га газрыг хамрах бөгөөд үүнд амралт, аялал жуулчлал, үзвэр үйлчилгээний томоохон төвүүд байрлах юм.
Энэхүү эрдэм шинжилгээний хурал болж буй Цонжин болдог дахь Чингис хааны хөшөөт цощолборын хажууд Их эзэн Чингис хаан болон монгол төрийн аюулгүй байдлыг хамгаалж байсан торгон цэргийн түмэн баримлыг "Түмэн хишигтэн" төслийн хүрээнд бүтээх, мөн уг цогцолборт түүх, соёлын олон цогц байгууламжийг барьж босгохдоо эрдэмтэн судлаачдын судалгаа, санал зөвлөгөөнд тулгуурлах, олон түмэнд бодит түүхэн мэдлэг, мэдээллийг түгээж байгаагаараа энэхүү эрдэм шинжилгээний хурал ач холбогдолтой юм.
Энэхүү хуралд Монгол улсын Шинжлэх Ухааны Академийн Түүхийн Хүрээлэн, Археологийн Хүрээлэн, Олон Улс Судлалын Хүрээлэн болон их дээд сургуулийн эрдэмтэн багш нар, монголч эрдэмтэн судлаачид зэрэг хүмүүс оролцож байгаа нь онцлог юм.