Монгол сүмочдыг хавчих сүмогийн холбооны бодлого одоо хүртэл замхраагүй байна. Үндэсний спортынх нь гурван үеийн аваргын суурь эзэгнэсэн монголчуудаас их аварга цолоо эргүүлэн авахын төлөө тэд ийнхүү аашилж байна гэж хөндлөнгийн хүмүүст харагддаг гэнэ. 70 дахь их аварга Харүмафүжиг өнгөрсөн башёд түрүүлэхгүй бол цол хураана, зодог тайлуулна гэх зэргээр шахаж, хавчиж байсан. Үүний хариуд Д.Бямбадорж жинтэйхэн хариу барьж, даваагаар тэргүүлж, ялалтаа дархалсан билээ.

Тэгвэл энэ сарын башёд Японы сүмогийн холбооныхон бүр ч хатуу шахалт хийж эхэлжээ. Башё эхлэхээс өмнө холбооны ерөнхийлөгч Китаноүми хэлэхдээ “Хэрэв дараалан гурав ялагдвал тэмцээнээс гаргах талаар ярина” гэсэн аж. Харамсалтай нь Харүмафүжи өчигдрийн учраа Тоёоношимад ямар ч барьцгүйн улмаас ялагдаж, гурван өдөр дараалан уналаа. Нэгэнт холбооноос урьдчилан сануулсан болохоор өнөөдрөөс эхлэн барилдуулахгүй гэж шийдэх магадлал өндөр юм. Энэ шийдвэр батлагдвал Харүмафүжигийн хувьд сэтгэл зүйн хүнд цохилт, амжилтаас нь чангаасан явдал болох нь. Гэвч их аваргыг дэмжигчид энэ удаад хатуухан шүүмжлээд өнгөрнө гэдэгт итгэж байгаа аж.