“Үндэсний супер лиг”-ийн “Бүх оддын” тоглолт энэ амралтын өдрүүдэд болно. Бямба, ням гарагт шилдэг, легионер тоглогчид үзэгчдийн нүдийг хужирлах юм. Монголын үндэсний сагсан бөмбөгийн холбооноос зохион байгуулж буй тоглолтын тасалбар тусдаа үнэтэй. Тодруулбал, маргааш болох ур чадварын тэмцээн 5000 төгрөгийн тасалбартай байх бол ням гарагийн холимог одод, бүх оддын тоглолтыг 3000 төгрөгөөр үзэх боломжтой. Хоёр өдрийн тоглолтын талаар товч танилцуулъя.
Спортын төв ордны “А” зааланд лигийн долоон багаас шалгарсан шилдэг 30 сагсчин хоёр багт хуваагдан өрсөлдөнө. Энэ үеэр холбон тоглогчдын ур чадварыг шалгасан үзүүлбэрүүд болох юм. Тухайлбал, олон улсын “Бүх оддын” шоунд гардаг шиг гурван онооны ши­дэлт, слам-данк буюу цаги­раг дээрээс довтлох үзүүл­бэр, багийн тэмцээн зо­хиог­доно. Нийт 30 тоглогчийн дотор “Эр­дэнэ­дрийлинг Ригс”, “ТЛЖ-13”, “СБЛ Хүлэгүүд”, “Танан Гарьд”, “Баянзүрх Буллс” багийн 3-5 тамирчин хуваарилагдсан бол “Харцага”, “Эхлэл” багаас нэг нэг сагсчин оролцох юм. Харин багийн тэмцээнд дөрвөн баг өрсөлдөхөөр болжээ. Бүрэлдэхүүнд багийн эзэн, одоо тоглож буй хоёр тамирчинтай хамт орж гурвын эсрэг гурав тоглолт хийнэ. Холбон тоглогчийн ур чадварын тэмцээнд зургаан тамирчин оролцохоор бүртгүүлснээс “СБЛ Хүлэгүүд”-ээс О.Сэргэлэн, М.Бадрах нар хамт орох юм. Бусад нь багаасаа ганцаараа оролцоно. Харин гурван онооны шидэлтийн тэмцээнд оролцох долоон тамирчны хоёр нь “Эрдэнэдрийлинг Ригс”-ийн тамирчин байгаа аж. Слам-данк буюу цагираг дээрээс довтлох үзүүлбэрт нийт таван багийн найман тамирчин өрсөлдөнө. Тухайлбал, “Баянзүрх Буллс”-ын Х.Бат-Эрдэнэ, Дикори Жонс, “СБЛ Хүлэгүүд”-ийн Б.Билгүүн, Девон Кларк, Маркус Хэммондс нар, “ТЛЖ 13”-аас Кэндрик Блэк, “Танан Гарьд”-ын Фрэдди Вүүдс, “Эрдэнэдрийлинг Ригс” багийн Маркус Скиннер слам-данк үзүүлнэ. Эдний дунд Спортын ордны шийдийг хагалсан “хэрэгтэн” Д.Кларк байгааг та анзаарсан биз ээ.

Ням гарагт 14 цагаас “Буянт-Ухаа спорт цогцолборт холимог оддын, бүх оддын тоглолт эхэлнэ. Урлагийн болон багийн эздээс бүрдсэн холимог одод эхэлж тоглох юм. Түүний дараа легионеруудын багтай Монголын сагсан бөмбөгийн үндэсний шигшээ баг өрсөлдөнө. Легионерын 12 тамирчны нэрийг дурдвал Кэндрик Блэк, Д.Андре Браун, Рафаэль Волтер Харрис, Дикори Жонс, Маркус Хэммондс, Маркус Скиннер, Дэн Хэдли, Фредрик Вүүдс, Лэвански Ньюсөүм, Энтонио Жонс, Крис Лэвсон, Девон Кларк нарын америкчууд байх юм. Харин манай шигшээ багт зургаан багийн 17 сагсчин багтсан. Тэдний дундаас гал гарсан тоглолтыг амралтын өдөр сонирхох боломжтой.