ОХУ-ын Санкт-Петербург хотноо болж байгаа олон улсын спортын байгууллагуудын цугларалт, форумын үеэр украины тамирчин, тулгууртай хаарайгч, олимпын аварга Сергей Бубка Олон улсын олмпын хорооны даргын сонгуульд өрсөлдөнө гэдгээ мэдэгдлээ. “Энэ бол миний хувьд чухал өдөр. Өчигдөр би ОУОХ-ны ерөнхийлөгч Жак Роггетэй утсаар ярьж энэ сонгуульд өрсөлдөнө гэдгээ хэлсэн. Харин өнөөдөр үүнийгээ албан ёсоор зарлаж байна” гэж Бубка өчигдөр болсон хэвлэлийн бага хурал дээр хэлжээ. ОУОХ-ны ерөнхийлөгчийн сонгууль ирэх есдүгээр сард Буэнос-Айрес хотноо болно. 71 настай Жак Рогге энэ албыг 2001 оноос алба хашиж байгаа юм.
Олимпын аварга, дэлхийн зургаан удаагийн аварга, дэлхийн дээд амжилтыг 35 удаа шинэчлэн тогтоож байсан тулгууртай харайгч Сергей Бубкагийн 6 метр, 14 см дээгүүр харайсан амжилтыг өнөөдөр ямар ч тамирчин давж чадаагүй байгаа юм. Өнөөдөр Украины Үндэсний олимпын хороог тэргүүлж байгаа түүний ОУОХ-ны тэргүүний суудлын төлөө хамгийн магадлалтай нэр дэвшигч гэж үзэж байгаа юм.