Жил бүр зохиогддог гар утас шидэлтийн дэлхийн аварга шалгаруулах тэмцээн Финляндын Савонлинн хотод болж өнгөрлөө. Эрэгтэйчүүдийн тэмцээнд Финляндын Рику Хаверие гар утсыг 97,73 метр хол шидэж аварга болсон бол эмэгтэйчүүдийн дунд Шведийн Осе Лундгрен 40,41 метр хол шидэж нэгдүгээрт орсон байна. Дэлхийн аварга шалгаруулах гэж сүржин нэр зүүсэн тэмцээн нь хошин, наргиан төдий ч гэлээ өрсөлдөгчид нь хөнгөн атлетикийн тамирчдын ашигладаг тусгай арга, техникийг хэрэглэн тун ширүүн өрсөлдсөн аж.
Тус тэмцээнд 220-400 грамм хүртэлх жинтэй гар утас шидэхийг зөвшөөрдөг. Энэ өвөрмөц тэмцээнийг Савонлинн хотын оршин суугч Кристина Луд гэгч эмэгтэй анх 2000 онд сэдэж, зохион байгуулсан байдаг. Түүнээс хойш энэ тэмцээн жил болгон зохиогддог болж үзэх гэж олон мянган жуулчид цуглардаг болсон төдийгүй зарим орнууд өөрсдөө зохион байгуулдаг болсон юм.